Ақмола облысының Зеренді қаласында «Supernovas Cup» турнирі өтті. 2012-2013 және 2014-2015 жылы туған балғын футболшылар жарысына облыс атынан Жәнібек ауданының «Supernovas» командасы қатысты.
Бірінші болып жарыс жолына шыққан 2014-2015 жылдары туған футболшылар кім мықтыны анықтады. Алдымен Шығыс Қазақстаннан келген «Алтай» командасының ойыншыларымен кездескен жәнібектік жас футболшылар қарсыластарын 7:0 есебімен тізе бүктірді.
Артынша Ақмола облысының Зеренді командасын 4:0, Алматы облысы Талғар ауданының ойыншыларын 10:1, Ақтөбе облысы Шалқар ауданының футболшыларын 2:1, Маңғыстаудан келген «Форт-Шевченконы» 4:0, одан соң Түркістан облысының намысын қорғаған «Ынтымақ» командасын 5:0 есебімен тас-талқан етті.
Күш алған жәнібектік жас футболшылар турнир барысында Солтүстік Қазақстан облысының «Благовещенка» командасын да бұйым көрмей 10:0 есебімен жеңсе, жартылай финалдық сында алаң иелері Зеренді ауданының командасын 9:2 есебімен тізе бүктірді. Финалда Ұлытау облысының өзі қатарлы футболшыларымен күш сынасқан Жәнібек ойыншылары қарсылас қақпасына жауапсыз бес гол соқты.
Турнирде өткізген тоғыз ойынның тоғызында жеңіске жеткен жәнібектіктер қарсыластарының қақпасына 56 гол соғып, төрт-ақ гол өткізді.
Інілерінің жеңісті жолын 2012-2013 жылғы футболшылар да жалғады. Олар алғашқы матчта Шығыс Қазақстан облысынан келген «Алтай» ойыншыларын 10:0, артынша Ақмола облысының «Жігер» командасын 4:0, алматылық «Талғар» командасын 10:0 етті.
Жиылған көрерменнің үлкен қошеметіне ие болған жәнібектіктер Жезқазғаннан келген қарсыластарын да аямады. Есеп 8:0. Түркістан облысының намысын қорғаған «Ынтымақ» командасы да Жәнібек футболшыларына қарсылық таныта алмады.
Аяушылықты білмейтін олар түркістандық қарсыластарын 12:0 есебімен тізе бүктірді.
Ал ақтық ойында алаң иелері Зеренді ауданының ойыншыларымен күш сынасқан Жәнібек футболшылары 3:0 есебімен жеңіске жетіп, турнир жеңімпазы атанды.
Түгелбай Бисен
zhaikpress.kz
