1 сәуір күні Қызылорда қаласында «BIALI марафон – 2022» республикалық мараоны оздырылды. ҚР жеңіл атлетика федерациясының Қызылорда облыстық филиалының қолдауымен, Қызылорда спорт бөлімі мен Жастар ресурстық орталығының ұйымдастыруымен өткен жарыста, жерлес марафоншы Баубек Ілиясов 8 шақырым қашықтықта 18-40 жас аралығында ерлер арасында жүлделі І орынға ие болды. Баубек Ілиясов арнайы қаржылай сертификатпен және кубокпен марапатталды.
Жергілікті БАҚ өкілдерінің хабарламасына сүйенсек, шараның салтанатты ашылуында облыстық дене шынықтыру және спорт басқармасының басшысы Асылжан Жаманқұл, кәсіби боксер, Сыр мақтанышы Қамшыбек Қоңқабаев, «Абзал и К» ЖШС директоры Мағжан Ералиев, BIALI спорт дүкенінің директоры Асхат Шаукенбаев сөз сөйлеп, қатысушыларға сәттілік тіледі.
Айта кетейік, жарысқа Ақтау, Орал, Қызылорда, Павлодар, Түркістан өңірлерінен 200-ге жуық марафоншылар қатысты. Баубек Ілиясовтың аталған жарысқа қатысуына жеке кәсіпкер, спорт жанашыры Нұрлыбек Хайруллин қолдау білдірді. Жерлесіміз казталовтықтарға және қолдау көрсеткен жандарға ризашылығын білдірді.
Асылбек Нәсіпқали,
zhaikpress.kz
