Жәңгір хан атындағы Батыс Қазақстан аграрлық-техникалық университетінде «Ғасыр» жастар қоғамдық бірлестігінің ұйымдастыруымен «Білімділер додасы» зияткерлік ойынының тағы бір кезеңі өтті.
Бұған дейін маусым айында зияткерлік ойынның екі кезеңі ұйымдастырылған болатын. Жәңгір хан атындағы Батыс Қазақстан аграрлық-техникалық университетінде өтіп жатқан іс-шараға үздік жастар командалары қатысып жатыр. Батыс Қазақстан облыстық қоғамдық даму басқармасының қолдауымен басталған бұл жоба өңір жастарының шығармашылығын дамытуға бағытталып отыр. Бұл жолы ойынға аудандардан келген командалар қатысты.
Бірнеше кезең бойынша өтетін зияткерлік ойында түрлі салада еңбек етіп, үздіктер қатарынан көрініп жүрген жастардың білім деңгейі сыналып, ақыл-ой деңгейлері таразыға түсті.
Бүгінгі зияткерлік ойынның жеңімпаздары арнайы дипломдармен марапатталып, статуэткалар табысталды.
Еске сала кетсек, жоба барысындағы үздік командалар жартылай финалда және финалдық кезеңде өнер көрсетеді. Жоба жыл соңына дейін жалғасады.
БҚАТУ медиа орталығы
