«Егемендік – елдігім, тәуелсіздік – теңдігім» атауымен Жәңгір хан атындағы БҚАТУ- дың кітапхана залында дөңгелек үстел өтті. Іс-шараға облыстық қоғамдық даму басқармасы басшысының орынбасары Гүлжанар Шөкеева, ТжӘЖЖ проректоры Ақылбек Сұлтанов, аға оқытушы, философия докторы (PhD) Асхат Әмен, аға оқытушы, философия докторы (PhD) Мақсот Джангужиев және аталмыш білім ордасының студенттері қатысты.
Жиын тізгінін ұстаған Мақсот Джангужиев Мемлекет басшысы Қасым-Жомарт Тоқаевтың мына бір сөзіне ерекше тоқталды. Президентіміз өз сөзінде:
«Тәуелсіздік – мемлекетіміздің алтын діңгегі, дербестігіміздің берік негізі. Тарихы бай, тамыры терең Қазақ елі үшін бұдан асқан қастерлі құндылық жоқ» деген болатын.
Жастарға патриоттық тәрбие беріп, отанды сүюге және ерлікке баулу мақсатында өткен аталмыш іс-шарада бірнеше баяндама оқылды.
– Әлемде 1 200-ге жуық ұлт өкілі болғанымен, олардың екі жүзі ғана тәуелсіз мемлекет қатарында. Тәуелсіздік – тұтас бір ұлттың бақыты. Бұл бәріміз үшін – ұлы бақыт! Бұдан асқан қуаныш, бұдан асқан мәртебе жоқ деп ойлаймын. Тәуелсіздік жолында құрбан болған аға-апаларымыздың есімін, ерлігін ұмытпауымыз қажет. Батыр бабаларымыз тәуелсіздіктің азабын көріп, ғажабын бізге қалдырды. Азаттық үшін күрескен ұлт перзенттері жадымызда мәңгілік сақталады. Тәуелсіз еліміз 33 жылда талай асулардан өтіп, шыңдарды бағындырды. Мемлекетімізді көркейтіп, гүлдендіру біз бен келешек ұрпақтың басты парызы, - деді облыстық қоғамдық даму басқармасы басшысының орынбасары Гүлжанар Шөкеева.
Сондай-ақ Жәңгір хан атындағы БҚАТУ студенттері де білген-түйгендерімен бөлісті.
Мәселен, 1 курс студенті Мағжан Қалихан «ҚР Тәуелсіздігі: жетістіктері мен тарихи маңызы» тақырыбында келелі ой қозғаса, 2 курс студенті Аманат Ибрагимов мереке күніне қатысты жыр- шумақтарын оқып берді.
Нұрым Ғұмар
zhaikpress.kz
