Бүгін Жәңгір хан атындағы Батыс Қазақстан аграрлық-техникалық университетіндегі ғылыми кеңестің кезекті отырысы техника ғылымдарының докторы, профессор Бекет Нұралиннің 70 жасына арналды. Бұл туралы БҚАТУ-дың медиа орталығы хабарлады.
Кеңес отырысына басқарма төрағасы-ректор Асқар Наметов, ғылыми кеңес мүшелері, мерейтой иесінің замандастары мен шәкірттері, шақырылған қонақтар қатысты. Алдымен ғалым-ұстаз Бекет Нұрғалиұлының өмірбаяны оқылып, университет басшысының құттықтау хаты тапсырылды.
Бұдан әрі сөз алған ардагер ұстаздар, әріптестері мен шәкірттері адалдықты ұстанып, саннан гөрі сапаға баса мән беретін профессор Б.Нұралиннің жеке адамгершілік қасиеттері, ұстаздық тұлғасы, ғылымдағы жолы туралы естеліктермен бөлісті.
1976 жылы сол кездегі Батыс Қазақстан ауыл шаруашылығы институтын «Ауыл шаруашылығын механикаландыру» мамандығы бойынша бітірген Б.Нұралин сол жылы аталған жоғары оқу орнына оқытушылық қызметке қабылданған. Өз қызметін ассистент лауазымынан бастаған Бекет Нұрғалиұлы аға оқытушы, доцент, оқу-әдістемелік бөлімінің меңгерушісі, Батыс Қазақстан аграрлық университетінің, М.Өтемісов атындағы Батыс Қазақстан мемлекеттік университетінің және Қ.Жұбанов атындағы Ақтөбе мемлекеттік университетінің оқу және оқу-әдістемелік жұмысы жөніндегі проректоры лауазымдарын абыроймен атқарған. Әр жылдары Батыс Қазақстан мемлекеттік және Батыс Қазақстан аграрлық-техникалық университеттерінің бірінші проректоры, «Аманат» Орал техникалық институтының ректоры болып қызмет еткен.
Өзінің білім-біліктілігін ұдайы жетілдіріп отырған профессор – 234 ғылыми және оқу-әдістемелік жұмыстың, оның ішінде халықаралық рейтингтік журналдардағы 8 мақаланың, 30 оқу құралының, 5 монографияның, 17 ғылыми патенттің авторы. Еңбегі елеусіз қалмаған ғалым-ұстаз 2003 жылы «Қазақстан Республикасының Білім беру ісінің құрметті қызметкері» төсбелгісін кеудесіне қадаса; 2010 жылы Орынбор облысы губернаторының ғылым және техника саласындағы сыйлығының лауреаты атанған. 2015 жылы ҚР кітап палатасының баспагерлері мен кітап таратушылар қауымдастығының «Техникалық ғылымдар бойынша үздік оқу басылымы» номинациясы бойынша I дәрежелі дипломмен; 2016 жылы «Ауыл шаруашылығы саласының үздігі» төсбелгісімен; 2017 жылы Қазақстан Республикасының «Ерен еңбегі үшін» медалімен; 2021 жылы «Ауыл шаруашылығы үздігі» төсбелгісімен марапатталған.
Ғылымға әлі де бергенінен берері мол мерейтой иесі Бекет Нұрғалиұлы жиын соңында университет ұжымы мен қонақтарға алғыс айтып, шынайы ризашылығын білдірді.
