Облыс әкімі Ғали Есқалиевтің хабарлауынша, өңірдің 2023 жылға арналған бюджеті жасақталу үстінде.
«Бүгінгі таңда 2023 жылға арналған бюджет жасақталу үстінде. Осыған орай, мен сізден туған өлкемізді көркейтуге бағытталған тың ұсыныстар мен жасампаз идеялар күтемін.
Бұл жол салу, көшелерді жарықтандыру сияқты жыл сайынғы бюджетке енгізілген ұсыныстар болмауы тиіс.
Облыс тұрғындары қажет ететін жобалар өте көп екенін айта кеткім келеді. Мысалы, жол бойындағы дәретханалар, Батыс Қазақстан облысы мен Орал қаласына кіреберістегі белгілер, тарихи ғимараттарды қалпына келтіру, көше өнерін дамыту, дәстүрлі фестиваль өткізу, мүгедек адамдар жолындағы кедергілерді жою және тағы басқасы.
Жинақталған идеялардың бюджеті анықталып, облыс тұрғындарының талқылауына және дауыс беру арқылы таңдауына ұсынылады. Бір немесе бірнеше идеялардың жалпы бюджеті шамамен 500,0 млн теңгеге дейін болады.
Сондай-ақ, бұрын белгіленген халықтық бюджетке сәйкес (https://m.facebook.com/story.php?story_fbid=2181083082032484&id=100003924403354) сметалық есептер аяқталып жатқанын және жаяу жүргіншілер өткелдеріне 180 шам орнатуды қазан айында бастау жоспарланғанын хабарлаймын.
Осы форматтағы жұмыстарды әлі де жалғастыруды көздеп отырғанымызды айтқым келеді. Өз ұсыныстарыңызды пост астына жазба ретінде қалдыруларыңызды және репост жасауды сұраймын, деп жазылған БҚО әкімінің facebook парақшасында.
