Жуырда облыс әкімі Нариман Төреғалиев өңір жастарымен кездесті. Жастармен ашық диалог өткізіп, өзекті сұрақтарға жауап беру, ұсыныстарды тыңдауды мақсат еткен іс-шараға жастар көптеп жиналды.
Еркін сипатта өткен кездесуде облыс әкімі аймақтың әлеуметтік-экономикалық және мәдени дамуында жастардың рөлі мен қоғамға қосар үлесі туралы пікір алмасты.
Жастар – елдің ертеңі, қоғамның қозғаушы күші. Олар білімді, мақсатшыл, креативті. Облысымыздың жастары тек елімізде ғана емес, халықаралық аренада да өз жетістіктерімен танылуда. Спортта, ғылымда, мәдениетте және кәсіпкерлікте үлкен нәтижелерге қол жеткізіп, өңіріміздің абыройын асқақтатып жүр. Соңғы жылдары жастарға қолдау көрсету бағытында облыс әкімдігі ауқымды жұмыстар атқаруда, оның ішінде: мемлекеттік бағдарламалар арқылы жастарды жұмыспен қамту, білім беру гранттарын ұсыну, жастардың кәсіпкерлік бастамаларын қолдау, спорттық және мәдени инфрақұрылымды дамыту, тұрғын үй мәселелерін шешу сынды мәселелерге көп көңіл бөлінуде.
Өңір жастарының өзекті мәселелерін талқылап, жаңа мүмкіндіктерді ашуға бағытталған маңызды алаңда жастар тек өз ойларын білдіріп қана қоймай, келер жылға арналған жоспарлары мен бастамалары туралы ой бөлісті.
Биылғы жылғы Жайдарман ойындарының жоғарғы лигасында жеңіске жеткен «Талант» жайдарман тобының мүшелері, «Дарын» жастар сыйлығының лауреаты, Орал қалалық жастармен жұмыс жөніндегі ресурстық орталықтың басшысы Дулат Жүсіпқалиев, «Қаладан ауылға!» жобасы бойынша ауылдық жерден кәсіп ашып, мал шаруашылығымен айналысып жүрген кәсіпкер Шарипа Базарбаева, жас ақын, көптеген хит әндердің ауторы Дәурен Шамұратов және «Ғасыр» жастар қоғамдық бірлестігінің өкілі Тасболат Серікқалиев сөз алып, өз ойларын ортаға салды.
Биыл облыстық қоғамдық даму басқармасының тапсырысымен өңірдегі 32 жас ақынның шығармашылығын қамтыған «Ақжайықтың аспаны» атты кітаптың тұсаукесер рәсімі өтті. Кездесу барысында аталған жыр жинақ өңір басшысына жастар атынан сыйға берілді.
Кездесу соңында жас ақын, Қазақстан Жазушылар одағының мүшесі Әділет Орынбасаров «Ақ Жайығым» атты өлеңін оқып берді.
Облыс басшысы мен жастар арасындағы пікір алмасу еркін сипатта жоғары деңгейде өтті.
Гүлжамал Жолдығали
zhaikpress.kz
