"Батыс Қазақстан облысында құқық қорғау органдары аса ірі көлемдегі лицензиясыз прекурсорлар мен химиялық заттарды тәркіледі", – деп хабарлайды Polisia.kz.
“Дәрмек” республикалық жедел-алдын алу іс-шарасы барысында ЖШС-нің бірінің өндірістік цехынан 14,5 тонна химиялық заттар табылып, алынды.
Тексеру кезінде цех аумағынан ерекше иісі бар сұйықтық құйылған үш бір тонналық пластикалық ыдыс және алты резервуар анықталды. Жалпы көлемі 14,5 тоннаны құраған бұл заттардың прекурсорлар мен химиялық элементтер екендігі белгілі болды. Сонымен қатар тексеріс нәтижесінде аталған ұйымның мұндай заттардың айналымына қажетті лицензиясыз жұмыс істегені анықталды. Осы жағдай бойынша сотқа дейінгі тергеу басталды.
Іс-шараның басты мақсаты – есірткі мен химиялық заттардың заңсыз айналымын тоқтату және оның алдын алу. Жедел қызметтің бес күндік жұмысы барысында аймақта есірткі, психотроптық немесе улы заттармен жұмыс істеу ережелерін бұзумен байланысты алты қылмыстық іс анықталды. Сонымен қатар 14 әкімшілік іс қозғалып, 14 адам жауапкершілікке тартылды, олардың ішінде 10 медицина қызметкері бар.
Тексеру нәтижесінде сақталу талаптары бұзылған құрамында есірткі және психотроптық заттар бар 1,5 мың ампула мен 745 таблетка тәркіленді. Бұл шара аймақтағы заңсыз әрекеттердің алдын алу және қоғамның қауіпсіздігін қамтамасыз етуге бағытталған жүйелі жұмыстың бір бөлігі болып табылады.
