Облыс әкімі Нариман Төреғалиевтің төрағалығымен аппараттық кеңес отырысы өтті. Жиын-да жер қатынастары саласы мен халықтың әлеуметтік осал топтары санатына жататын адамдарды баспанамен қамтуға қатысты маңызды мәселелер талқыланды.
Өңірде мал санының өсуіне байланысты жайылымдық жерлердің тапшылығы байқалады. Бірнеше гектар жерді иемденіп, пайдаға асырмай отырғандар да жеткілікті. Президент өз Жолдауында заңсыз алынып, игерілмей жатқан жер оңтайландырылған рәсім бойынша мемлекетке қайтарылуы тиіс екенін ылғи айтып жүр. Осы мақсатта биыл пайдаланылмай жатқан көлемі 62 570 га құрайтын ауыл шаруашылығы мақсатындағы жерлер мемлекет меншігіне қайтарылды. Облыстық жер қатынастары басқармасының басшысы Нұржан Мақсотовтың айтуынша, бос жатқан жерді мемлекет меншігіне қайтаруда Ақжайық, Теректі аудандары және Орал қаласының көрсеткіштері төмен.
– Қазіргі күнде қайтарылған жерлерді айналымға шығару жұмыстары да қатар жүргізілуде. 85 мың га жер конкурсқа шығарылып, 355 мың га жер қорға енгізілсе, 136 мың га жер тұрғындар мұқтаждығын қанағаттандыруға берілді. Бұрынғы жылдары конкурссыз берілген жер учаскелерін заңдастыру жөніндегі арнайы комиссия құрылды. Бүгінгі таңда арнайы комиссия отырысында 2007-2018 жылдар аралығында берілген жерлерді заңдастырылуы туралы мәселелер қаралды. Жалпы 4 отырыстың қорытындысында 6495 жер учаскесі комиссия қарауына шығарылып, оның 5079-ын заңдастыру туралы шешім шықты. 271 жер учаскесі бойынша материалдар тексеруге жолданып, 1145 жер учаскесі мемлекет меншігіне қайтарылды, – деп атап өтті Нұржан Мақсотов.
Биыл халықтың әлеуметтік осал топтарына жататын тұрғындарға 758 пәтер сатып алу жоспарланған. Бұл мақсатқа 12,3 млрд теңге бөлінген.
– Бүгінгі күні 758 пәтердің 413-і бойынша конкурс жарияланып, оның ішінде 190 пәтер сатып алынды. 345 пәтер бойынша конкурс рәсімдері жарияланған жоқ. Орал қаласында – 175, Бөрлі ауданында – 132, Теректіде – 10, Бәйтеректе – 54, Ақжайықта – 37, Жаңақалада – 67, Казталовта – 116, Тасқалада – 34, Сырымда – 45, сондай-ақ Жәнібек ауданында – 28, Шыңғырлауда – 36, Қаратөбе – 2, Бөкей ордасы ауданында – 22 пәтерді сатып алу жоспарлаған. Бұл бағытта төмен нәтиже көрсетіп отырған Қаратөбе және Теректі аудандары бойынша бірде-бір конкурстық рәсімдер жарияланбаған. Бүгінгі күні сатып алынатын пәтерлер бойынша жүргізілген мониторингке сәйкес, жоспардың орындалмау тәуекелі Теректі, Казталов және Тасқала аудандарында бар. Осыған байланысты тұрғын үйлерді сатып алатын болса, 1 қарашаға дейін қаражатты шешу бойынша өтінім жолдауы және дайын тұрғын үйлері бар басқа аудандарға қайта бөлуі қажет, – деді жиында сөз алған облыстық құрылыс басқармасының басшысы Әлібек Антазиев.
Облыс әкімі игерілмеген жерлер бойынша жұмыстарды аудан, қала бойынша тез арада пысықтап, аяқтауға тапсырма берді. Сондай-ақ халықтың әлеуметтік осал топтарына арнап салынып жатқан үйлерді 15 қазанға дейін жеделдетіп тапсыру қажеттігін ескерткен облыс әкімі құрылыс сапасына аса мән беру керектігін шегелеп айтты.
Гүлжамал Жолдығали
zhaikpress.kz
