Кардиолог Аурелио Рохас ең пайдалы жеміс ретінде кивиді атады, өйткені оның қорек құндылығы алма, көкжидек, авокадо мен бананнан жоғары. Бұл туралы ABC басылымы жазды, - деп хабарлайды Massaget.kz тілшісі.
Фото: pixabay.com
Рохастың айтуынша, кивиді асқазан-ішек жолында мәселелері бар адамдар міндетті түрде тұтынуы керек, себебі ол ас қорытуды жақсартатын талшыққа бай. Сондай-ақ бұл жемістің гликемиялық индексі төмен. Бұл оның қандағы қант деңгейін реттеуге және инсулиннің күрт көтерілуінің алдын алуға көмектесетінін білдіреді, деп атап өтті дәрігер.
Сонымен қатар, кивиде С және Е дәрумендері көп мөлшерде бар. «Олар — күшті антиоксиданттар мен қабынуға қарсы заттар, артерияларда холестерин түйіндерінің пайда болуына жол бермейді», — деп түсіндірді Рохас.
Оның айтуынша, кивидің басқа да пайдалы қасиеттеріне иммундық жүйені нығайту және ағзадағы май мөлшерін азайту жатады.
