Астанада Ұлттық қауіпсіздік комитетінің бұрынғы басшысы Кәрім Мәсімовке тиесілі үйге ұқсайтын үй сатылымға шығарылды. Бұған дейін комитет сәнді сарайдың суреттерін жариялаған болатын, - деп хабарлайды Tengrinews.kz тілшісі.
Лот E-Qazyna электрон сауда алаңы сайтында жарияланған. Төменгі қабаты бар тұрғын үй елорданың Нұра ауданында орналасқан. Екі қабатты үйдің жалпы ауданы 2877,7 шаршы метр болады. Оның бастапқы бағасы 1 883 338 958 теңге деп белгіленген. Сонымен қатар, әлеуетті сатып алушы 117 960 теңге кепілдік жарнасын енгізуі қажет.
Сурет: tengrinews.kz
Үйге әртүрлі көлемдегі бірнеше жер учаскесі тиесілі, олардың бірінде гараж орналасқан. Үй 879 дана мүлікпен бірге сатылады. Оның ішінде жиһаз, тұрмыстық заттар, әшекей бұйымдар, коллекциялық монеталар, қару-жарақ макеттері.
Мүлікті Қайтарылған активтерді басқару компаниясы сатылымға шығарған. Сауда бағаны көтеру арқылы аукцион форматында өтеді.
