Жаһандық экологиялық қордың 8-ші Ассамблеясы аясында Қазақстан Республикасы Экология және табиғи ресурстар министрі Е. Нысанбаевтың халықаралық маңызы бар сулы-батпақты алқаптар жөніндегі Рамсар конвенциясының Атқарушы хатшысы Мусонда Мумба ханыммен кездесуі өтті. Бұл туралы Қазақстан Республикасы Экология және табиғи ресурстар министрлігі жазды.
Кездесу барысында Қазақстан мен Рамсар конвенциясының Хатшылығы арасындағы ынтымақтастықты одан әрі нығайту мүмкіндіктері талқыланды. Атап айтқанда, ұлттық және өңірлік бастамаларды ілгерілету, трансшекаралық сулы-батпақты алқаптар, экологиялық дәліздер мен құстардың көші-қон жолдарына қатысты жобаларды жүзеге асыру, сондай-ақ маңызды экожүйелер мен сулы-батпақты алқаптарды сақтау мәселелері қарастырылды.
Сонымен қатар, БАӘ астанасында өтетін БҰҰ-ның Су ресурстары жөніндегі конференциясы алаңында Халықаралық су ұйымын құру бастамасы аясында су ресурстарын тұрақты басқару мәселелері бойынша диалогты жалғастыру ұсынылды.
