Қазақтар туралы жақсы пікір, жағымды пайымдау жасағандардың бірі орыс тарихшысы, этнограф, орыс География қоғамының Батыс Сібір бөлімінің мүшесі Александр Никитич Седельников еді.
Ол 1897-1919 жылдары Алтайға 12 рет саяхат ұйымдастырған ғалым, өзі жүрген өлкенің өзен-көлдерін зерттеп 20-дан астам еңбек жазады. Оның «Зайсан көлі» атты кітабы Орыс География қоғамында ерекше аталып, оған кіші алтын медалі беріледі.
Ғалым қазақтар туралы: «Азияда көшіп-қонып жүретін түркілердің ішінде қырғыз-қазақтар басқаларға қарағанда, мәдениетті халық. Сондықтан олардың болашағы мол. Бұл халық жаңалықты бойына тез сіңіреді екен.
Қырғыз-қазақтың мәдениеттілігін тілінің сипатынан, өз ойын дұрыс жеткізу жөніндегі қабілетінен және сөйлеу формасынан, халық әдебиетінің байлығынан және мәдениетінің даму деңгейінен аңғаруға болады.
Қырғыздардың қоғамдық өмірі жақсы дамыған, ол - адам сыйлау, ел қыдыру және сауық құру әрбір отбасындағы қуаныш мерекелерге ұласып жатады, Ондайда бүкіл ауылды және туыстарын шақырады. Әңгіме-дүкен құрады, ойындар ойналады, ән мен жыр толас таппайды», - деп жазады.
Зұлқожа Шарафутдинов,
zhaikpress.kz
(«Қазақтар». Энциклопедиялық анықтамалық. А. 2003 жыл)
