Қазақстан Республикасы Тәуелсіздігінің 30 жылдығына және ҚР Конституциясы күніне орай «Жастар» стадионында мәдениет қызметкерлері арасында қазақ күресінен «Өнер барысы – 2021» қалалық ашық турнирі өтті.
Бұл спорттық сайыстың ашылу салтанатында Орал қаласы әкімінің орынбасары Ерлан Ғалиев сынға түскен балуандарға сәттілік тіледі. «Біз – Алтайдан Атырауға, Арқадан Жетісуға дейінгі аралықты білектің күшімен, найзаның ұшымен қорғаған батырлардың ұрпағымыз. Сондықтан қазақтың жігіттері күшті болуы тиіс. Осыған дейін көпшілікті өнерімен таң қалдырған дарабоздар бүгін басқа қырынан танылады», – деді ол.
Батыс Қазақстан облысының қазақ күресі ассоциациясы мен Орал қаласы әкімдігінің қолдауымен «Мәдени-ағарту бірлестігі» ұйымдастырған турнирде 10 команда бақ сынады. Қатысушылар боз кілемде алты салмақ дәрежесі бойынша белдесті. Намыс додасына Ақжайық, Бәйтерек, Бөрлі, Жаңақала, Казталов, Сырым, Тасқала, Шыңғырлау аудандары, Орал қаласы және БҚО мәдениет басқармасының командалары қатысты.
Тартысты жарыс қорытындысы бойынша Орал қаласының командасы І орын жүлдесін қанжығасына байлады. Жаңақалалықтарға ІІ орын бұйырса, Казталов балуандары ІІІ орынға табан тіреді. «Үздік техника» аталымымен Д.Қайырлиев марапатталып, «Жеңіске деген жігері үшін» аталымын Н.Байниязов иеленді. Жеңімпаз-жүлдегерлерге дипломдар мен ақшалай сыйлықтар табысталды. Жарысқа қатысқан командалар алғысхаттармен марапатталды.
Марлен Ғилымхан,
zhaikpress.kz
