Бүгін республика бойынша кезектен тыс Президент сайлауы басталды. Таңғы сағат 7.00-де Зачаганск кентіндегі №10 Ахмет Байтұрсынов атындағы жалпы орта білім беретін мектепте орналасқан №427 сайлау учаскесіне де дауыс беруге асыққан кент тұрғындарын көруге болады.
Мектеп ауласына кірер есік алдында аяқ киім жууға арналған орын әзірленіп, жабдықтар қойылған. Сайлау учаскесіне кірген кезде қызметкерлер сайлаушыларды қарсы алып, мекенжайын сұрап, жол сілтеп тұр.
Сайлау учаскесінің хатшысы Жадыра Айтқалиеваның айтуынша, учаске өз жұмысын таңғы сағат 07.00-де бастаған. Сайлаушылар белсенді келіп, дауыс беріп, өз таңдауларын жасап жатыр екен. Сайлаушылардың барлық санатына дауыс беру қолайлы, ыңғайлы болу үшін ерекше қажеттіліктері бар сайлаушыларға да жағдай жасалған. Төрт дауыс беру кабинасының біреуі осы ерекше қажеттіліктері бар жандарға арналған. Учаскеге таңмен келген ең бірінші сайлаушыға және алғаш дауыс берген 18 жастағы студент сайлаушыға сыйлықтар табысталған. Сайлау учаскесіне 7 бақылаушы тіркелген, шетелдік бақылаушылар жоқ, тек қоғамдық ұйымдар атынан тіркелген бақылаушылар.
ҚР Орталық сайлау комиссиясының хабарлауынша, облыстардың, республикалық маңызы бар қалалардың, елорданың комиссиялары ұсынған деректерге сәйкес 2022 жылғы 20 қарашада елорда уақытымен сағат 7.15-тегі жағдай бойынша өңірде 8150 учаске дауыс беруге кіріскен.
Альфия Шамаева,
zhaikpress.kz
Фотоларды түсірген автор
