Биыл Мемлекет басшысы Қасым-Жомарт Тоқаевтың Жарлығымен 10 тамыз – Абай күні болып белгіленді.
Бүгін Орал қаласындағы Абай ескерткіші алаңында Абай күніне арналған Орал қалалық мәдениет және тілдерді дамыту бөлімінің ұйымдастыруымен мерекелік шара өтті.
Алдымен өңір басшысы Ғали Есқалиев, ақын Ақұштап Бақтыгереева бастаған зиялы қауым өкілдері ақын ескерткішіне гүл шоқтарын қойды.
Бұл күні ескерткіш жанында ақынның өлеңдері қашалып жазылған екі ескерткіш-тақтайша ашылды. Ол жөнінде Орал қаласының әкімі Абат Шыныбеков таныстырды.
Мерекелік шарада Батыс Қазақстан облысының әкімі Ғали Есқалиев, Мемлекеттік сыйлықтың лауреаты, ақын Ақұштап Бақтыгереева сөз сөйлеп, жиналғандарды Абай күнімен құттықтады.
- Қазақтың бас ақыны, ағартушы, Ұлы Абайдың 175 жылдығына орай ақынның ұлылығына, талантына тағзым ету үшін мерекелік шараға жиналып тұрмыз.
Абай осыдан бір жарым ғасыр уақыт бұрын өмір сүрсе де, соңына қалдырған мұрасы ұрпақтан-ұрпаққа тарап, жалғасып келеді. Сол кезде жазған шығармаларының өзі бүгінгі заманмен үндесіп жатқандай әсер қалдырады.
Абай поэзиясының түпкі негізі – адам. Ұлы Абай армандаған адам еңбекқор, білімді, адал, әділ, жылы жүректі, ақыл-парасаты мол, қайратты, ғылым жолына түскен ізденімпаз адам болуы керек.
Ұлы ақынның:
«Пайда ойлама, ар ойла,
Талап қыл артық білуге.
Артық білім кітапта,
Ерінбей оқып көруге» деген басқа да өнегелі де өсиетті сөздері қазақты мәдениетті қоғамға шақырады.
Абай атамыздың 175 жылдығы құтты болсын! - деді облыс әкімі Ғали Нәжімеденұлы.
- Қазақ халқының ең бақытты күні – Ұлы Абайдың туған күні болу керек.
10 тамыз – Абай күні Ұлттық мерекесі болып жариялануы біз үшін үлкен мәртебе. Ұлт үшін, ұлы дала баласы үшін маңызды күн, мереке. Ұлттық мереке Абай күні құтты болсын! Ұлы Абайдың есімі әр жүрекке жазыла берсін!
Абай күні мерекесі күніне деген құрметіміз ерекше болуы керек. Өз туған күнімізден де артық көрейік, бұл күнді, - деді құттықтау сөзінде ақын Ақұштап Бақтыгереева.
Мерекелік шарада Ұлы Абайдың өлеңдері мен қарасөздері оқылып, әндері шырқалды.
Тағылымды шараға барлық сақтық шараларын сақтай отырып, зиялы қауым өкілдері, мектеп оқушылары қатысты.
Ертай Бимұханов,
zhaikpress.kz
