Бүгін ақын Ақұштап Бақтыгерееваның 80 жылдығына арналған көркемсөз оқу шеберлерінің байқауы өтті.
Биыл қазақ халқының талантты ақын қызы, Мемлекеттік сыйлықтың иегері, халық арасында Жайықтың ақ шағаласы атанған Ақұштап Бақтыгерееваның 80 жылдық мерейтойы республика көлемінде кеңінен аталып өтіп жатыр. Ақынның туған өлкесі Ақжайық өңірінде де біршама іс-шаралар өткізіліп жатыр.
Батыс Қазақстан облысының мәдениет, тілдерді дамыту және архив ісі басқармасының қолдауымен «Мен жастарға сенемін» жобасының аясында облыстық жас мұғалімдері арасында көркем сөз оқу шеберлерінің байқауын жарияланған болатын.
Көркем сөз оқу шеберлері байқауының мақсаты – ақын Ақұштап Бақтыгерееваның поэзиясын кеңінен насихаттау болса, екіншіден азаматтық қоғамдағы белсенді, талантты жас ұстаздарды шығармашылық тұрғыдан қолдап, көркем сөз оқу шеберлерін таныту, ынталандыру болды.
Ережесіне сай көркем сөз оқу шеберлері байқауына 20-35 жас аралығындағы облыстың жас мұғалімдері қатысты.
Көркем сөз оқу шеберлері байқауына қатысушылар ережеге сәйкес, Ақұштап Бақтыгерееваның екі өлеңін мәнерлеп жатқа оқуға міндетті. Байқауға облыс бойынша 24 жас мұғалімнен өтініш келіп түсті, деп хабарлады облыстық мәдениет, тілдерді дамыту және архив ісі басқармасы.
Көркем сөз оқу шеберлері байқауына қатысушы үміткерлердің өлеңдерін тыңдап, өнерлеріне әділ бағасын берген қазылар алқасы республикаға танымал ақындар мен ғалымдардан, театр актерларынан жасақталды.
Байқаудың қорытындысы бойынша бас жүлдені Орал қаласы №50 ЖОББМ мұғалімі Индира Медетқызы иеленді.
Бірінші орынды Ақжайық ауданындағы Ж.Молдағалиев ат. ЖОББМ мұғалімі Айдархан Сайын, екінші орынды Тасқала ауданына қарасты Амангелді ауылындағы Амангелді МББК тәлімгері Ару Ихсанова және Орал қаласы №41 ЖОББМ мұғалімі Нұргүл Абайқызы, үшінші орынды Орал қаласы №37 ЖОББМ мұғалімі Жазира Жақсыбайқызы, Орал қаласы №33 ЖОББМ мұғалімі Сымбат Раимбекқызы, Бәйтерек ауданы Володар ЖОББМ мұғалімі Гаухар Құттыбекқызы иеленді.
Барлық қатысушылар бағалы сыйлықтармен марапатталды, жас мұғалімдерге естелік кәдесый беріліп, алғысхаттар табыс етілді.
