Қадыр Мырза Әлі атындағы мәдениет және өнер орталығында «Ана тілім – айбыным» атауымен әскери және құқық қорғау салалары қызметкерлері арасында облыстық байқау өтті.
БҚО мәдениет, тілдерді дамыту және архив ісі басқармасы ұйымдастырған іс-шара аталмыш сала өкілдерінің арасында мемлекеттік тілдің мәртебесін, маңызын және құқықтық мәдениет пен ізігілік, парасаттылық рухын арттыруды мақсат тұтты.
Байқауда бақ сынаған БҚО ТЖД-ның «Жалын», БҚО полиция департаментінің «07 аймақ», ҰҚК Шекара қызметі БҚО департаментінің «Қалқан» және ҚР Ұлттық ұланы «Батыс» өңірлік қолбасшылығының 5517 әскери бөлімінің «Айбын»командалары жақсы дайындықпен келгенін көрсетті.
Олар «Ана тілім – айбыным», «Мамандығым – мақтанышым», «Елтаным», «Өнерліге – өріс кең» сынды кезеңдер бойынша сынға түсті.
Ақын-ұстаз, ҚР білім беру ісінің үздігі, жұбантанушы Үзілдік Елеубайқызы жетекшілік еткен қазылар алқасының шешімімен «07 аймақ»командасы үздік болды. «Жалындықтар» екінші орын алса, қалған 3 орынды «Қалқан» мен «Айбын» өзара бөлісті.
Қуаныш Қали
Орал қаласы
