Орал қаласында «Білімділер додасы» зияткерлік сайысының ашық лигасының іріктеу кезеңі өтті. Әртүрлі салада қызмет атқарып қана қоймай, қоғамдық іс-шараларға белсене қатысып жүрген жастардан құралған 10 команда интеллектуалды білімдерін ортаға салып, өзара бақ сынады.
Аталмыш білім додасын әлеуметтік тапсырыс аясында облыстық қоғамдық даму басқармасы және БҚО жастармен жұмыс жөніндегі ресурстық орталығының қолдауымен «Шабыт» шығармашылық бастамалар орталығы» қоғамдық бірлестігі және ҚазИИТУ білім кешені ұйымдастарған.
Биыл үшінші мәрте өткелі отырған зияткерлік сайыс Батыс Қазақстан инновациялық және телекоммуникациялық жүйелер университетінде болды. Кең ауқымда жүзеге асқан сайыс 60-қа жуық қатысушыны қамтыды.
Олардың ішінде: П.Атоян алаңының директоры Артур Үмбетқалиев, БҚО жастармен жұмыс жөніндегі ресурстық орталығының басшысы Аңсар Ибраев, танымал тележүргізуші Біржан Кухаев, БҚО дзюдо федерациясының президенті Рустам Шайқы, М.Өтемісов атындағы БҚУ студенті Дархан Қуатов бар.
Іс-шараға арнайы қатысқан облыстық қоғамдық даму басқармасының басшысы Дархан Қадырәлиев өңірдегі игі бастамаларға ұйытқы болып, бір адамдай жұмылған жастар үшін осындай қызыққа толы жобаларды көптеп ұйымдастыру қажет екенін сөзге өзек етті.
– Еліміз жаңашыл бастамаларды көтеретін әлеуетті жастардың арқасында ілгері дамып келеді. Әрине, қандай қиын жағдай орын алса да, өкше басар, бота тірсек саңлақтарымыз алдыңғы қатардан табылып жүр. Алайда, арқа-жарқа болып шаттанатын, думанды кеште бас қосқанға не жетсін? Өтетін ол кештерде оқыған-білгендері сыналып, ақыл-ой деңгейлері таразыға түсумен ерекшеленсе ғажап емес пе? Жүзден жүйрік жастарымыз сан салалы бағыттың басын қайырып әкететіні даусыз. Осыған дейін, Білімділер додасы әртүрлі мекеме қызметкерлері арасында, студенттер, оқушылар арасында бірнеше рет өткен болатын. Міне, бүгін өнер, спорт, ақпарат салалары мен қоғамдық жұмыстарға белсене араласатын қаланың менмін деген жастарын жиып, осындай шара жүзеге асуда, - деді Дархан Қадырәлиев.
Өңіріміздің жастарын біріктіріп, жаңа қазақстандық патриотизмге, ұлтаралық рухани келісімге тәрбиелеу, талантты жастардың мәдени, рухани дамуына, білім мен тәрбиесінің жетілуіне, оларды білікті маман ғана емес, жан-жақты, ұлтжанды тұлға етіп қалыптастыру мақсатында ұйымдастырылған. Аталмыш жобаға алғаш рет қатысып отырған, жаңа қатысушылар да бар.
– «Кіл мықтыда, кім мықты?» демекші, бүгін әртүрлі салада қызмет атқаратын, қоғамдық жұмыстар барысында танысқан достарыммен емен-жарқын жүздесіп жатырмыз. Білімділер додасына өз басым алғаш қатысқалы отырмын. Сайыстың бұған дейінгі шығарылымдарын көріп, мен де қатыссам ғой деген арман-тілегім айтылмай іште қалып жүрген. Бүгінгі білім бәйгесіне жан-жақты ізденіп, тыңғылықты дайындықпен келдім. Елімізге белгілі әзілкеш, жайдарманшы Әскербек Баянғалиевтың командасында БҚО қоғамдық даму басқармасының жастар ісі жөніндегі бөлім басшысы Мирфат Бисекеновпен бірге бақ сынаймын. Жалпы орта білім беретін №1 мектептің ағылшын тілі пәні мұғалімімін. Осындай шараларға педагогтарды елеп-ескеріп, оларды тыс қалдырмай, ортаға қосып жатқандарына ризамын. Үздік сала мамандарының бірі ретінде қатысушылар тізімінде бар екенімді көріп, қуанып та отырмын. Қазір бой жарыстыратын емес, ой жарыстарын заманда зияткерлік сайыстардың өткізілуі құптарлық іс. Әрі жас маман ретінде үйреніп, білерміз мол, - деді №1 ЖОББМ мұғалімі Сұлушаш Жұмабаева.
Білімділер додасы зияткерлік ойыны 2021 жылы Орал қаласының жастармен жұмыс жөніндегі ресурстық орталығы мен ҚазИИТУ білім кешенінің ұйымдастыруымен, Ақжайық телеарнасының қолдауымен бастау алған.
Биыл «Жайық жастары» фестивалі аясында алғаш рет 12 ауданның жастары арасында өтті. Айта кетелік, іріктеу кезеңінен 7 команда жартылай финалға жолдама алып, одан үздік 3 команда таңдалып финалдық бәсекеге қатысады.
Ойын қорытындысы бойынша 4 команда жартылай финалға жолдама алса, аппеляциялық сұранысқа байланысты 2 команда қосымша жолдама иегері атанды. Ал жартылай финалдағы ойын 18 қараша күні өтеді.
Нұрым Ғұмар
zhaikpress.kz
