Бүгін Орал қаласындағы эстетикалық бағыттағы мектеп-гимназиясы шаһардың солтүстік-шығыс ауданында бой көтерген жаңа білім ордасына көшті. Білім күні қарсаңында пайдаланылуға берілген мектептің ашылу салтанатына облыс әкімі Ғали Есқалиев қатысты.
Айта кетейік, 1993 жылы өз жұмысын бастаған эстетикалық бағыттағы мектеп-гимназия осы кезге дейін қала орталығындағы ескі балабақша ғимаратында орналасқан еді. Көне ғимаратта 500-ден астам оқушы үш ауысыммен білім алған. Дегенмен тозығы жеткен ғимаратта да білікті ұстаздар қызмет етіп, оқушыларға сапалы білім беріліп келген. Осы мектепті тәмамдаған бірқатар оқушылар мемлекетіміз бен шет елдерден білім алып, бүгінде еліміздің әр өңірінде жемісті еңбек етіп жүр.
-Күні кеше Конституциямыздың 25 жылдық мерейтойын атап өттік. Енді, міне, 1 қыркүйек - Білім күнінің қарсаңында су жаңа мектеп пайдаланылуға беріліп отыр. Біздің Ата заңымыздың 30-шы бабында азаматтардың мемлекеттік оқу орындарында тегін орта білім алуына кепілдік беріледі деп айқын көрсетілген. Осы міндетті орындау үшін өңірімізде бірқатар ауқымды жұмыстар атқарылуда. Бүгінгі таңда облыс бойынша 30 білім ордасы күрделі жөндеуден өтікізілсе, тыңнан алты мектеп салынуда. Құрылысы жүріп жатқан мектептердің төртеуі мемлекет қаржысына, ал екеуі жеке инвесторлардың есебінен бой көтеруде. Бүгінгі пайдаланылуға берілген мектепті салуға демеуші болған «КПО б.в» компаниясының басшылығына, құрылысты жүргізген «Наурыз» компаниясының жетекшілері мен жұмысшыларына зор алғыс айтамын. Мектеп ұстаздары мен оқушыларын ертеңгі Білім күнімен құттықтап, сәттілік тілеймін,- деді облыс әкімі.
Аталған мектеп жаңа оқу жылын 850 оқушымен бастамақ. Бірінші сыныпқа 140-тан астам бүлдіршіндер қабылданатын болады. Математика мен ағылшын тілін тереңдетіп оқытуға бағытталған мектепте сапалы білім мен саналы тәрбие алуға барлық жағдайлар жасалған.
-Біздер елдегі күрделі жағдайға қарамастан мектептің құрылысы сәтті аяқталғанына қуаныштымыз. Бұған дейін де «КПО б.в.» компаниясы өңірдің әлеуметтік-экономикалық дамуына өз үлесін қосып келді. Коронавирус індеті өршіген шақта да біз өз тарапымыздан облыс емханаларына қолдау көрсеттік. Облыс басшылығымен екеуара келісімге келу арқылы су жаңа білім ошағы бой көтерді. Қала және осы шағын аудан тұрғындарын, ұстаздар қауымы мен білім алушыларды жаңа оқу жылының басталуымен шын жүректен құттықтаймын,- деді қазақ тілінде лебізін білдіруге тырысқан «КПО б.в.» компаниясының бас директоры Эдвин Блом.
Мектеп директоры Әлия Қайыржанова айтуынша, 1-4 сынып оқушылар толық күнмен қамтылып, үш мезгіл тамақ ішіп, осы жерден тапсырмаларын орындап, үйлеріне тек тынығуға барады. Бұл ата-аналарға өте ыңғайлы жағдай. Сондай-ақ аталған мектепте математика, биология және гуманитарлық пәндерді бейінді оқыту жолға қойылған. Биылдан бастап жеті қазақ сыныбы ашылып, оқушылар қабылданған. Мектепте 77 ұстаз болса, соның 53%-ы жоғары санатты ұстаздар.
-Бұл мектепте білім саласындағы жаңашылдық саналатын «STEM» білім беру жүйесі жүзеге асатын болады. Яғни оқушылардың функционалдық сауаттылығын арттыруға, қолдан түрлі нәрселер құрастыруға, алған білімдерін тәжірибеде жүзеге асыруға аса мән берілмек. Сонымен қатар физика, математика, химия, биология кабинеттері соңғы үлгідегі заманауи техникалармен толықтай қамтылған. Мектепте домбыра, пианино, фортепиано, би үйірмелері жұмыс жасайтын жеке сыныптар бар. Оқушы түске дейін сабақ оқып, түстен кейін сол үйірмелерден дәріс ала алады,-дейді қалалық білім беру бөлімінің басшысы Ақжарқын Темірханова.
Құрылысы өткен жылы басталған мектептің құрылысына «КПО б.в.» компаниясы есебінен 1,7 млрд. теңге қаражат бөлінген. Белгіленген жоспарға сай салынған мектепке толықтай жергілікті құрылыс материалдары пайдаланылған.
Нұрбек Оразаев,
zhaikpress.kz
