Айта кетейік, өңірде алғаш рет өткізіліп отырған «JAIYQ JASTARY» фестивалінің негізгі мақсаты - талантты жастар мен үздік ұжымдарды анықтау, олардың шығармашылық әлеуетінің артуына жағдай жасау, облыс жастары арасында достық байланыс орнатуға бағытталған.
Аталған шараға қатысушы жастар волейбол, шағын футбол, тоғызқұмалақ, киберспорт, үстел тенисі, қазақ күресі, садақ ату, эстрадалық және дәстүрлі ән, үздік ақын, аспапта үздік орындау, сурет салу өнері, хореография секілді 13 бағыт бойынша сынға түседі.
Фестивалдің ашылу салтанатына қатысқан облыс әкімі Нариман Төреғалиев өзінің жастарға деген тілегін жеткізді.
-Туған қаламыздың орталық алаңында, Халықаралық жастар күні қарсаңында сіздермен кездескеніме қуаныштымын. Тәуелсіздік алған кезден бастап уақыт өткен сайын еліміз жаңа белестерді бағындырып, көптеген жетістікке жетіп жатыр. Бұл істерге жастардың қосып отырған үлесі де зор. Қазіргі жастар өз Отанының патриоты, бәсекеге қабілетті, отансүйгіш азамат ретінде қалыптасып келеді. Өйткені, Жаңа Қазақстанның жастары — ел дамуы жолында бар білімі мен күш қуатын сарқа жұмсап, әр түрлі салада өздерін жан-жақты танытып жүр. Бүгінде өңірімізде жастар саны облыс халқының 20%-ын құрап отыр, оның тең жартысын ауыл жастары құраса, облыстың жоғары оқу орындары мен техникалық және кәсіптік білім беру ұйымдарында 50 мыңға жуық жас білім алуда. Облыс бойынша мемлекеттік жастар саясатын дамытуда 14 жастар ресурстық орталығы, 50-ден аса жастар ұйымы, 25 мыңнан астам волонтер белсенді қызмет атқаруда. Жыл сайын жастар саясатын жүзеге асыру үшін бөлінетін қаржының көлемі де артып отыр. Жазғы мезгілде құрамында 1500 жасты қамтитын «Жасыл Ел» және студенттік құрылыс жасақтары белсенді жұмыс жасауда. Құрметті жастар, бүгінгідей байқаулар Сіздерге өз мүмкіндіктеріңізді байқауға, қолдарыңыздан не келеді, не келмейді, соны білетін, шын үздік екендеріңізді дәлелдейтін керемет шара. Осындай шаралар арқылы жастарымыздың бәсекеге қабілетті болып қалыптасуына қол жеткіземіз деген сенімдемін. Күні кеше елімізде Абай күні тойланды. Ұлы Абай атамыз «Әсемпаз болма әрнеге, өнерпаз болсаң арқалан. Сен де - бір кірпіш дүниеге, кетігін тап та бар қалан!» деп болашақ ұрпаққа керемет өсиет қалдырды. Әрқайсыңыздың осы өмірден өз орындарыңызды табуға тілектеспін. Тағы бір мәрте бүгінгі - Жастар күнімен құттықтаймын, дендеріңізге саулық, отбасыларыңызға, ата-аналарыңызға амандық, мол табыс пен жетістік тілеймін, - деді өңір басшысы.
Фестивальдің ашылу салтанатына қатысқандар «Сурет салу», «Үздік ақын», «Хореография» аталымдары бойынша байқау қатысушылардың өнерлерін тамашалады.
Нұрбек Оразаев,
zhaikpress.kz
