Қаржы мониторингі агенттігінің БҚО-дағы департаменті Оралда сәйкестендіру құралдарынсыз құны 967 миллион теңгеден асатын 1,6 миллион қорап темекі партиясын жойды.
Агенттіктің хабарлауынша, бұған дейін департамент сотқа дейінгі тергеу жүргізіп, екі өлшемді матрицалық штрихкодсыз темекі өнімін сататын адамдар тобын анықтаған.
Соттың шығарған үкімі негізінде адамдар қылмыстық жауапкершілікке тартылды.
Ал тәркіленген темекі жойылуға тиіс болды.
Сондай-ақ басқа іс бойынша сот бұған дейін ҚМА БҚО-дағы департаментінің заттай дәлелдемелерді, атап айтқанда, тиісті құжаттарсыз заңсыз кәсіпкерлік қызметті анықтау нәтижесінде тәркіленген DataMatrix бар темекілерді өткізу туралы өтінішін қанағаттандыру туралы қаулы шығарған болатын.
Осы сатылымнан түскен 84 млн теңге сотқа дейінгі тергеп-тексеру аяқталғаннан кейін сот шешімі бойынша мемлекет кірісіне аударылды.
