«Атамекен» өнер ордасында Мұнай-газ машина жасау форумы және Операторлардың ашық есік күні өтті. Іс-шараны ҚР Энергетика министрлігі және облыс әкімдігінің қолдауымен Мұнай-газ машина жасауын дамыту халықаралық орталығы ұйымдастырды.
Форум қатысушылары алдымен 40-қа жуық отандық кәсіпорынның көрмесін аралап, мұнай-газ саласына арналған өнімдермен танысты.
Пленарлық отырыста Құрылтай депутаты Ерік Қожаниязов, Энергетика вице-министрі Ерлан Ақбаров және облыс әкімі аппаратының басшысы Нұрділдә Ораз құттықтау сөз сөйледі.
Облыс әкімі аппаратының басшысы Нұрділдә Ораз аймақ басшысы Нариман Төреғалиевтің құттықтауын жеткізіп, бұл форум Президент тапсырмасына сәйкес ірі операторлардың сұранысын отандық кәсіпорындардың өндірістік әлеуетімен ұштастырып, өзара тиімді келісімдерге қол жеткізетін іскерлік алаң екенін атап өтті.
- Біздің мақсатымыз – инвестиция көлемін арттыру ғана емес, оның өңір экономикасына беретін нақты қайтарымын қамтамасыз ету. Ірі жобалар жергілікті кәсіпорындардың дамуына, өндірістік қуаттардың артуына және жаңа жұмыс орындарының ашылуына қызмет етуі тиіс. Бұл – Президент жүктеген нақты міндеттер, – деді Нұрділдә Ораз.
Форумда «ҚазМұнайГаз» ҰК» АҚ өкілі Шафкат Құдабаев, «Теңізшевройл» ЖШС басшысы Уильям Лакоби, NCOC өкілі Жандос Оразалиев, KPO b.v. басшысы Марко Марсили, IMBC бас директоры Дастан Әбішев және KMG PetroChem басшысы Диаз Диянов баяндама жасады.
Іс-шара аясында «ҚазМұнайГаз» ҰК» АҚ, ірі операторлар мен отандық өндірушілер арасында жалпы құны 700 млн АҚШ долларына жуық келісімшарттарға қол қойылды. Бұл өткен жылғы көрсеткіштен 240 млн долларға артық.
800-ден астам қатысушы жиналған форумда өндірісті жергіліктендіру, сатып алу талаптары мен халықаралық стандарттар талқыланып, B2B кездесулер ұйымдастырылды.
БҚО әкімінің баспасөз қызметі
