Бүгін Наурыз мерекесі қарсаңында қаламыздың солтүстік-шығыс ауданында орналасқан тағы бір тоғыз қабатты көппәтерлі тұрғын үй пайдалануға беріліп, 180 отбасы қоныс тойын тойлауда.
Өңірімізде «Нұрлы жер» бағдарламасы аясында алғаш рет «Шаңырақ» пилоттық жобасы сәтті жүзеге асып, «Отбасы банк» салымшылары болып табылатын тұрғын үй кезегінде тұрған азаматтар жаңа баспанаға қол жеткізді. Бұл бағдарлама бойынша беріліп отырған алғашқы тұрғын үй кешені. Жоба бойынша тұрғын үйдің жалпы аумағы 10221,84 шаршы метрді құрап отыр.
Өңірдегі эпидемиялық ахуал қызыл аймаққа енуіне байланысты салтанатты ашылу рәсімі өткен жоқ. Десе де облыс әкімі Ғали Есқалиев мейрам алдында баспаналы болған отбасылардың үйіне бас сұғып, мерекемен арнайы құттықтап барды.
Өңір басшысы алдымен Тимур Бисенғалиевтің шаңырағына бас сұқты.
- Баршаңызды келіп жеткен Ұлыстың Ұлы күні Әз-Наурыз мейрамымен құттықтаймын. Мереке қарсаңында тұрғындардың қуанышына ортақтасып, «құтты болсын» айтуға арнайы келдік. Үйдің сапасына қатысты айтар ұсыныс-пікірлеріңізді тыңдауға әрдайым дайынбыз. Бұл үй бір жылдың ішінде пайдалануға беріліп отыр. Қазіргі таңда қаламыздың солтүстік-шығыс ауданы жылдан-жылға көркейіп, қарқын алып келеді. Жаңа әлеуметтік нысандар көптеп бой көтеруде. Болашақта тағы да мектеп пен балабақшалар салынады. Шаңырақтарыңызға құт пен береке тілеймін, - деді облыс әкімі Ғали Нәжімединұлы.
Тимур Бисенғалиев бүгінгі таңда БҚО Полиция департаментінде полиция қызметкері болып жұмыс жасайды, үш баланың әкесі. 2002 жылдан бері пәтер жалдап келген жас отбасы 2008 жылдан бастап үй кезегіне тұрған. Биыл «Шаңырақ» бағдарламасы бойынша екі бөлмелі пәтерге қол жеткізіп отыр.
Бұдан кейін жаңа пәтерге ие болған Орал арнаулы әлеуметтік қызмет көрсету орталығында дәрігер болып қызмет атқаратын Гүлбану Хисамеденова шаңырағына арнайы құттықтай келген облыс басшысына өз ризашылығын білдірді.
Айта кетелік, бүгінгі таңда әр санат бойынша 21 мыңға жуық адам тұрғын үй кезегінде тұр.
- «Шаңырақ» пилоттық жобасы тұрғын үй кезегінде тұрған жандар үшін өте қолайлы бағдарлама болды деп айта аламын. Өйткені қазан айында ғана енгізілген бағдарлама талабы бойынша 10% алғашқы жарнамен 20 жылға 5 %-дық үстемақымен үй алу өте тиімді. Бұл бағдарламаға қатысу үшін міндетті түрде үй кезегінде тіркелу керек және соңғы алты ай ішіндегі табысты растауды қажет етеді. Қазіргі таңда тұрғын үйдің нарықтағы бағасы шаршы метр үшін 175980 теңге, ал пайдалануға берілген тұрғын үйдің бағасы шаршы метр үшін 140 мың теңгені құрап отыр, - деді Орал қаласы бойынша тұрғын үй жекешелендіру секторының меңгерушісі Шайхиев Ерлан.
Ләззат Ғиниятқызы,
zhaikpress.kz
