Оралда «Өзбекәлі және мәдени майдан» кітабының таныстырылымы өтті. Бұл кітап мемлекет қайраткері Өзбекәлі Жәнібеков туралы еңбек.
Туынды авторлары шығыстанушы Санжар Керімбай мен жазушы, аудармашы Әділбек Нәби. Кітаптың алғашқы тұсаукесері Алматы қаласында өткен. Автор Санжар Керімбай бұл кітаптың таныстырылымы Қазақстанның барлық қалаларында өтеді деген жоспары барын айтты.
Кітаптың тұсаукесеріне БҚО танымал әдебиет, мәдениет қызметкерлері мен оқырман жастар жиналды.
- Бұл кітапты жазу идеясы 2022 жылдың қараша айында келді. Әлеуметтік желіде тікелей эфир өткізіп Өзбекәлі Жәнібековтың «Тағдыр тағылымы» кітабын насихаттап отырғам. Содан Румынияда отырған Қазақстанның елшісі Нұрбақыт Рүстем телефон соғып Өзбекәлі Жәнібековтың көзін көрген куәгерлердің әлі бар екендігін олар өте құнды ақпарат айта алатындығын айтты. Сөйтіп өзі телефондарын тауып, тізім жасап берді. Содан мен Қазақстанды шарлап Өзбекәлі Жәнібековпен бірге жұмыс істеген адамдардан естелік жинауды бастап кеттім. Сол естеліктер негізінде Өзбекәлі Жәнібековтың мәдени майдандағы ерлігі туралы кітап жазып шықтық, - деді автор Санжар Керімбай.
Кітаптың үш апта ішінде 5000 тиражы сатылып кеткен.
- Енді қосымша 6000 тираж басылып шықты, - деді Санжар Керімбай.
Жанат Көшкінбай,
Фотоға түсірген автор
zhaikpress.kz
