Оралдағы Дина Нұрпейісова атындағы скверде тәжік-ауған шекарасында ерлікпен қаза тапқан жауынгерлерге арналған ескерткіш ашылды.
Оған тәжік-ауған шекарасындағы оқиғаға қатысқан ардагерлер мен туыстары, әскери қызметкерлер қатысты. Жиналғандар алдымен шекарада қаза тапқандарды бір минут үнсіздікпен еске алды.
- Алдымен баршаңызды 7 мамыр – Отан қорғаушылар күнімен шын жүректен құттықтаймын!
Көпшілікке мәлім, 1992-1993 жылдары тәжік-ауған шекарасында ұрыс қимылдары басталған болатын. Осы әскери іс-қимылдарға қазақстандықтар да аттанып, 46 жауынгер қаза тапты. Бейбіт күнде басын қатерге тіккен сарбаздардың арасында 350 батысқазақстандық болды. Қазіргі уақытта Оралда аталған ұрысқа қатысқан 128 жерлесіміз тұрады.
Тәжік-ауған ардагерлері – бізбен әркез байланыста. Қоғамдық шаралардың үнемі бел ортасында жүреді. Кіші архитектуралық форма орнату жөнінде ұсыныс білдіріп, жобасын өздері дайындады. Біз де бұл ұсынысты құп көріп, тарапымыздан тиісті жұмысты жүргіздік. Нәтижесінде, бүгін осы кіші архитектуралық форманың ашылуына куә болып отырмыз. Ел тыныштығы үшін жанын қиған ержүрек әскери қызметкерлердің рухына тағзым етеміз. Жауынгер жерлестерімізге арналып орнатылған кіші архитектуралық форма жас ұрпақтың ұлттық рухын, патриоттық сезімін арттыруға себепші болатыны сөзсіз, - деді шарада Орал қаласының әкімі Миржан Сатқанов.
Архитектуралық форманы қала әкімі Миржан Сатқанов пен БҚО тәжік-ауған шекарасындағы ұрыс қимылдар мен әскери қақтығыстар ардагерлері одағының төрағасы Әлішер Ашурматов ашты.
Шарада БҚО қорғаныс бөлімі Департаменті бастығының бірінші орынбасары Асылбек Дюсембиев те мерекемен құттықтап, аталған департамент бастығынының атынан марапат табыстады.
Әскери қызметкерлер Бақтияр Молдиярұлы, Асхат Амангелдіұлы, Абат Мақажанұлы және Жүсіпбек Өтемұратұлын алғыс хатпен марапаттаса, Асхат Таналиев пен Абат Дүйсенбиевке "ҚР Қарушы күштеріне 30 жыл" медалі, Бақтыгерей Өтепбергенұлына "Тұран" төсбелгісі берілді.
Ал Әлішер Орынбайұлы облыс әкімі және БҚО тәжік-ауған шекарасындағы ұрыс қимылдар мен әскери қақтығыстар ардагерлері одағының атынан ескерткішті ашуға қолдау білдірген бір топ азаматқа алғыс хат берді.
Динара Насыр,
Фото: Әділет Ғабдрешев
zhaikpress.kz
