Орал қаласындағы Ұлттық ұланның 5517 әскери бөлімінің аумағында орналасқан №479 дауыс беру учаскесі таңғы сағат 06:00-де өз жұмысын бастады. Бұл учаскенің ерте ашылуының өзіндік себебі бар. Өйткені Ұлттық ұлан әскери қызметшілерінің негізгі міндеттерінің бірі – қоғамдық тәртіп пен қауіпсіздікті қамтамасыз ету.
Осыған байланысты әскери қызметшілер азаматтық борыштарын ертерек орындап, референдумда алғашқылардың бірі болып дауыс берді. Сарбаздар дауыс беру арқылы елдің қоғамдық-саяси өміріндегі маңызды науқанға өз үлестерін қосып, белсенділік танытты.
Дауыс беру рәсімі аяқталғаннан кейін әскери қызметшілер жауынгерлік қызметке кірісіп, қала көшелері мен дауыс беру учаскелері орналасқан аймақтарда қоғамдық тәртіпті қамтамасыз етуге атсалысады.
Айта кетейік, референдум күні қоғамдық қауіпсіздікті қамтамасыз ету мақсатында Ұлттық ұлан жауынгерлері күшейтілген режимде қызмет атқарады.
ҚР Ұлттық ұланы «Батыс» өңірлік қолбасшылығының баспасөз қызметі
