Оралда тоғызқұмалақтан жасөспірімдер мен жастар арасындағы ел чемпионаты өтіп жатыр. Бірнеше күн бұрын басталған озық ойлы спортшылар бәсекесінде классика әдісінің жеңімпаз жүлдегерлері анықталды.
Оралдағы тоғызқұмалақ бәсекесінің алғашқы жеңімпаздарын БҚО дене шынықтыру және спорт басқармасының басшысы Бақдәулет Сәбитов және Қазақстан Республикасы тоғызқұмалақ федерацияның президенті Әкім Тұрсын марапаттады.
Бес күнге созылған тоғызқұмалақтың классика түрі додасында 21 жастағы қыздар арасында үшінші орынды жамбылдық Әсел Сейтбекова мен Түркістан облысының спортшысы Ақбота Намаз иеленсе, павлодарлық Аяжан Егінбай екінші, тағы бір павлодарлық спортшы Жәмиля Баилдяшева ел чемпионы атанды.
Осы жастағы ерлер сайысында Алматы облысының тоғызқұмалақшысы Олжас Олжатаев пен шымкенттік Әкбар Жанарыс үшінші, қызылордалық Дамир Ахметов екінші, Қарағанды облысының намысын қорғаған Әділхан Төлегенов бірінші орынға ие болды.
19 жастағы ұлдар мен қыздар да ел чемпионы атағын сарапқа салды. Бұл жас ерекшелігінің үздіктерін Тоғызқұмалақтан ҚР мемлекеттік жаттықтырушысы, ҚР-нің еңбек сіңірген жаттықтырушысы Дәулет Абдикаримов пен Ұлттық спорт түрлері бойынша облыстық БЖСМ директоры Ерболат Байбатыров марапаттады. Қорытындысында 19 жастағы қыздар бәсекесінің үшінші орыны Ақтөбе облысынан келген Қарашаш Сатмулдина мен қостанайлық Айым Әлібекқызына, екінші орын павлодарлық Аружан Сәлменге бұйырса, тағы бір павлодарлық Аяна Исахан бірінші орынға табан тіреді. Осы жастағы ұлдар сынында Қайрат Тұрарбек (Ақтөбе облысы) пен Әзиз Азыралы (Жамбыл облысы) үшінші, Айдын Жакиев (Қостанай облысы) екінші, қызылордалық Ақылбек Нұржан бірінші орынға ие болды.
17 жастағы жасөспірім ұлдар мен қыздарды марапатын жарыстың бас төрешісі, ҚР Еңбек сіңірген спорт шебері Хакимжан Елеусинов пен БҚО тоғызқұмалақ федерациясының атқарушы директоры Данияр Орынбасаров ұсынды.
17 жастағы юниор қыздар арасында үшінші орынды Ақнұр Махсатқызы (Алматы облысы) мен Мөлдір Жандарбек (Қызылорда облысы), екінші орынды Томирис Даулетбек (Алматы облысы), бірінші орынды Елдана Оралбай (Павлодар облысы) иеленді.
Осы жастағы жасөспірім ұлдар арасында үшінші орынға Әзімхан Махмутжан (Астана қаласы) мен Арсен Есентай (Алматы облысы), екінші орынға Мирас Аманжол (Қарағанды облысы) табан тіресе, бірінші орын Темірлан Сапарға (Павлодар облысы) бұйырды.
15 жастағы жасөспірім ұлдар мен қыздарды үздіктерін ҚР Еңбек сіңірген жаттықтырушы Нұрбек Қабиев пен Екі дүркін Әлем чемпионы Салтанат Сапарбекова марапаттады. Бұл сында үшінші орынды Райхан Оразбаева (Павлодар облысы) мен Аяна Абай (Алматы қаласы), екінші орынды Гүлім Пернебай (Шымкент қаласы) иеленсе, ел чемпионы атағын Айару Қалдыбекова (Түркістан облысы) жеңіп алды.
15 жастағы жасөспірім ұлдар арасында үшінші орынды Абдрахман Текебай (БҚО) мен Дінмұхаммед Арғынғазин (Ақтөбе облысы), екінші орынды Нұрғиса Қадырбек (Шымкент қаласы), бірінші орынды Азамат Халел (Павлодар облысы) иеленді.
Ел чемпионаты әлі де жалғасады.
Түгелбай Бисен
«Орал өңірі»
