Оралдық полицейлер өзгенің көлігін заңсыз иемденген азаматты “ізін суытпай” қолға түсірді, деп хабарлайды Polisia.kz.
21 қараша күні сағат 10:30 кезінде Шаған ПБ кезекші бөліміне 43 жастағы Шаған ауылының тұрғыны хабарласып, Жәңгір хан көшесіндегі үйлердің ауласына қойылған ВАЗ-2112 автокөлігін белгісіз біреудің айдап әкеткені туралы хабарлама келіп түседі.
Ақпарат келіп түскен бойында тосқауыл жоспары жарияланды. Орал қаласы ПБ жедел-басқару орталығындағы камералардың көмегімен автокөліктің қозғалу бағыты анықталды. Полиция қызметкерлерінің жедел іс-әрекеттері нәтижесінде оқиға ізін суытпай Орал қаласы ПБ патрульдік полиция батальонының қызметкерлерімен облыс орталығы аумағынан автокөлік анықталып, ұсталды.
Қазіргі уақытта көлік иесіне қайтарылды. Ұсталған 19 жастағы азаматқа қатысты ҚР ҚК-нің 200-бабы 1-бөлігіне (Автокөлікті айдап әкету) сәйкес тергеу жұмыстары басталды.
Айта кету керек, жыл басынан Орал қаласы ПБ жедел басқару орталығындағы бейне бақылау камераларының көмегімен 137 қылмыстық іс, оның ішінде 7 ұрлық, 20 тонау, 17 автокөлікті ұрлау, 20 бұзақылық және 73 өзге де қылмыстар ашылды.
Еске салар болсақ, қарашаның 20 мен 30 күндері аралығында облыс аумағында республикалық “Құқықтық тәртіп” жедел-профилактикалық іс-шарасы өтіп жатыр, осыған байланысты полиция қызметкерлері күшейтілген бағытта қызмет атқарып жатыр..
