Қазақстанға дәнді дақылдарды әкелуге тыйым салынса да, өнімдерді заңсыз әкелуге әрекеттер байқалып отыр. Белгіленген шектеулерді айналып өту үшін әртүрлі әдістер қолданылады. Мысалы, 6 қыркүйекте Батыс Қазақстан облысының теміржол фитосанитарлық посттарында аумақтық инспекция инспекторлары Ресей Федерациясының Саратов облысынан келген төрт вагон бидайды (251 тонна) тауып, кері қайтарды. Бұл туралы АШМ-ның баспасөз қызметі хабарлады.
Сурет: freepik.com
«Вагондар Талдықорғанға бағытталған.
Бұл факт дәнді дақылдардың контрабандасы әрекеттерінің жалғасып жатқанын көрсетеді.
Өсімдіктер карантині бойынша инспекторлар үздіксіз бақылау мен қадағалау жүргізіп, тексерулер жүргізіп, ақпаратты талдайды. Ережелердің сақталуын қадағалайды және заң бұзушылықтарды анықтайды. Бұл елдің фитосанитарлық қауіпсіздігін және азық-түлік қауіпсіздігін қамтамасыз ету үшін қажет.
Еске сала кетейік, ішкі нарықты қорғау және дәнді дақылдарды қайта экспорттау фактілерін болдырмау үшін 2024 жылдың 26 шілдесінде Сыртқы сауда саясаты және халықаралық экономикалық ұйымдарға қатысу мәселелері бойынша ведомствоаралық комиссияның отырысында Қазақстан аумағына үшінші елдерден және ЕАЭО елдерінен келетін бидайды барлық көлік түрлерімен әкелуге 2024 жылдың 31 желтоқсанына дейін тыйым салу туралы шешім қабылданды.
Бұл шешім Қазақстан аумағы арқылы бидайдың транзитін қоспағанда, күшіне енеді», деп хабарлады министрліктен.
