Бәйтерек ауданындағы «Шаған» өткізу пунктінде заңдылықты, құқықтық тәртіпті және қылмысқа қарсы күресті қамтамасыз ету жөніндегі облыстық үйлестіру кеңесінің отырысы өтті. БҚО прокуроры Нұрбек Ұласбекұлы төрағалық еткен жиынға аймақ басшысы Нариман Төреғалиев, ҰҚК аумақтық департаментінің бастығы Бақытжан Валениязов, БҚО полиция департаментінің бастығы Арман Оразалиев қатысты.
Кеңес мүшелері алдымен өткізу бекетінің жұмысымен, инфрақұрылымының жай-күйімен және техникалық жарақтандырылуымен танысты. Одан кейін мемлекеттік шекарадағы заңдылықты қамтамасыз ету, заңсыз көші-қонның алдын алу және өткізу пункттерін дамыту мәселелері талқыланды.
Жиында облыс әкімі Мемлекет басшысы Қасым-Жомарт Тоқаевтың ел қауіпсіздігін нығайту жөніндегі тапсырмаларын іске асыру аясында шекара маңындағы инфрақұрылымды кешенді дамыту қажеттігін атап өтті. Атап айтқанда, бекеттердің материалдық-техникалық базасын кезең-кезеңімен жаңарту, заманауи бақылау жүйелерін енгізу, кірме жолдарды жақсарту, электрмен жабдықтау мен байланыс сапасын арттыру мәселелеріне назар аударды.
«Мемлекеттік шекараның қауіпсіздігі – елдің егемендігі мен аумақтық тұтастығының кепілі. Шекара бекеттерін жаңғыртумен қатар, ел шебінде қызмет атқаратын азаматтарға қолайлы жағдай жасау, әскери қызметшілерді баспанамен қамту мәселелеріне де ерекше көңіл бөлуіміз қажет. Бұл ретте ведомствоаралық байланысты одан әрі нығайтып, барлық құзырлы органның үйлесімді жұмысын қамтамасыз ету маңызды. Шекара қауіпсіздігі – баршамызға ортақ жауапкершілік», – деді аймақ басшысы.
Сондай-ақ отырыста шекара маңындағы жер қатынастарын реттеу, бақылау рәсімдерін оңтайландыру, заңсыз көші-қон мен контрабанданың алдын алу шаралары қаралды.
Кеңес қорытындысында шекара саласындағы өзекті мәселелерді кешенді шешуге бағытталған үш жылдық тұжырымдама талқыланды. Жауапты мемлекеттік органдарға нақты іс-шаралар жоспарын әзірлеп, оның орындалуын тұрақты бақылауда ұстау қажеттігі айтылды.
БҚО әкімінің баспасөз қызметі
