Тасқала ауданы орталығындағы «Сәулет» шағынауданында тұратын көршілер №332 сайлау учаскесіне бірге барып дауыс берді. Бұл шағынауданда 1 371 сайлаушы тіркелген. Дәл қазіргі сәтте 350-ге жуық адам таңдау жасады.
– Біз, көршілер, елдегі саяси науқандарға үнемі бірге барамыз. Жыл санап ауызбіршілігіміз артып, бірлігіміз нығайып келеді. Сайлауға балаларымызды да ертіп апарамыз. Себебі олардың да осындай жауапты сәтке куә болып, мән-мазмұнын ұғына бергені абзал. Біз бірлігі жарасқан ел үшін, ынтымақты болашақ үшін, ұрпағымыздың кемел келешегі үшін дауыс бердік, - деді аталмыш шағынауданың тұрғыны Темірболат Әнуарұлы.
Тасқала ауданы бойынша 10 881 сайлаушы бар.
Айна Имашева
