Күні кеше ғана Батыс Қазақстан облыстық камералық оркестрі Түркияда концерт өткізіп келді. Тәуелсіздік күніне орай ұйымдастырылған кеш «Ыстанбұлға Ақ Жайықтан сәлем!» атауымен өтті.
Айта кетейік, алдымен оркестр директоры Салтанат Абулгазиева мен оркестрдің көркемдік жетекшісі Асхат Хасанов Қазақстанның Ыстанбұлдағы бас консулы Нұриддин Аманқұлдың қабылдауында болды.
Зейтінбурны ауданындағы өнер орталығында өткен концертке аталған аудан әкімінің бірінші орынбасары Осман Динч, Қазақстанның Ыстанбұлдағы бас консулдығының консулы Бекайдар Сары, доктор Аадем Услу, доктор Решиде Юксель, Зейтінбурны қоғамы бірлестігінің бастығы Дильман Қая, түркі музыка өнерін зерттеуші, домбырашы Седат Солакоглу, Шығыс Түркістан мигранттар одағының төрағасы Режеп Акьол және тағы басқа түрік өкілдері мен қандастарымыз қатысқан.
Концертте «Камералық оркестрге арналған күй», Абай Құнанбайұлының «Көзімнің қарасы», Нұрғиса Тілендиевтің «Ата толғауы» толғауы орындалып, облыстың өнер жұлдыздары ән айтты.
- Облыстағы оркестрлар арасынан алғашқы ұжым болып шетелде концерт беріп, қазақ өнерін, қазақ музыкасын дәріптеп келдік. Көрермен қазақ әндерінің, күйлерінің шекті аспаптарда орындалуы керемет, үні мүлде басқа деп таң қалды. Келесі жылы шетелдегі қандастарымыз Австрияның астанасы Венада бас қосады. Сол кездесуге Шығыс Түркістан мигранттар одағының төрағасы Режеп Акьол оркестр ұжымын да шақырғысы келетінін айтты. Бізге қолдау көрсеткен облыс әкімдігіне алғыс білдіреміз, - дейді оркестр директоры Салтанат Мақсотқызы.
zhaikpress.kz
Көрермен не дейді?
Рашида Юксель, доктор :
- Батыс Қазақстан облыстық камералық оркестрінің концерті маған өте ұнады. Менің ұлтым қазақ болғанымен Түркияда өстім. Екі ел арасындағы ынтымақтастықтың кепілі - ел президенттері Қасым-Жомарт Тоқаев пен Реджеп Тайип Эрдонганның дендеріне зор денсаулық, ұзақ жасасын деймін! Көк байрағымыз желбірей берсін!
Бекайдар Сары, Ыстанбұлдағы бас консулдықтың консулы:
- Керемет әсер алдым. Барлық қазақстандықты 16 - желтоқсан Тәуелсіздік күнімен құттықтаймын! Концерт ұйымдастырып, Ыстанбұл төрінде паш еткетдеріңізге көп рахмет! Шығармашылық табыс тілеймін!
Тұран Бахадыр, қазақ диаспорасының өкілі:
- Ыстамбұлда 15-20 мың қазақ бар. Мұндай концерттер көп болғаны жақсы. Қазақтарымыз да тыңдап, өз мәдениетін көреді. Сол үшін керек. Өнер - жан азығы. Кеш керемет болды.
Анара ханым, Түркиядағы "Түркі әлемі" Қазақстан қауымдастығының президенті:
- Батыс Қазақстан облыстық камералық оркестрінің шетелдегі алғашқы дебюті құтты болсын! Шетелде тұрып жатқан біз секілді қандастарына елге деген сағынышын басып, ыстық сәлемін жеткізіп келгені үшін үлкен алғыс білдіремін! Концерт өте тамаша өтті.
zhaikpress.kz
