Бұл туралы ҚР Еңбек және халықты әлеуметтік қорғау министрлігі хабарлады.
2022 жылдың қорытындысы бойынша аталмыш министрліктің қорғау комитетінің аумақтық департаменттерінің мамандары мүгедектігі бар адамдар үшін қолжетімділікті қамтамасыз ету бойынша мемлекеттік бақылау жүргізу шеңберінде мемлекеттік басқару, денсаулық сақтау, әлеуметтік қорғау, мәдениет, жеке кәсіпкерлік және тағы басқа саладағы әлеуметтік және көлік инфрақұрылымы объектілеріне 1062 тексеру жүргізген.
Олардың қорытындысы бойынша анықталған бұзушылықтарды жою туралы 900-ден астам ұйғарым беріліп, жалпы 60 млн теңгеден астам, 300-ге жуық әкімшілік айыппұл салынған.
Бұзушылықтардың ең көп саны Түркістан (бұзушылықтардың жалпы санының 23%), Қостанай облыстарында (22%) және Алматы қаласында (7%) анықталды. Бұзушылықтардың негізгі бөлігі жеке кәсіпкерлік объектілері мен 2015 жылға дейін пайдалануға берілген объектілерге тиесілі.
Жергілікті жерлерде объектілерді бейімдеу және осы ақпараттың қолжетімділігі жөніндегі шараларды мониторингтеу үшін мүгедектігі бар адамдарға «Қолжетімділіктің интерактивті картасы» порталы жұмыс істейді. Порталдағы деректерді жергілікті атқарушы органдар толтырады.
Мүгедектігі бар адамдар белгілі бір объектіге барар алдында, үйден шықпай (компьютерден немесе телефоннан) оның бейімделу дәрежесін көре алады. Сондай-ақ кейіннен қол жетімділікке баға бере алады.
Парламент Сенаты қабылдаған ҚР Әлеуметтік кодексінде «әлеуметтік инспектор» ұғымы енгізілді, ол Кәсіпкерлік кодексіне сәйкес ҚР-дағы мүгедектігі бар адамдарды әлеуметтік қорғау және арнаулы әлеуметтік қызметтер көрсету саласындағы бақылау функцияларын іске асырады. Бұл функциялар ҚР ЕХӘҚМ Еңбек және әлеуметтік қорғау комитетінің аумақтық департаменттерінің қызметкерлеріне берілді.
Өңірлік деңгейде аудан және қала әкімдерінің орынбасарлары бекіткен мүгедектігі бар адамдар үшін қолжетімділікті қамтамасыз ету жөніндегі 227 мониторингтік топ құрылды, олардың құрамына 1630 адам кірді.
Биыл наурыз айының соңында үкіметтік емес ұйымдар өкілдерінің, өңірлер әкімдерінің мүгедектігі бар адамдар істері жөніндегі кеңесшілерінің және мемлекеттік органдар қызметкерлерінің қатысуымен мүгедектігі бар адамдарға қолжетімділікті қамтамасыз ету жөніндегі республикалық жұмыс тобының отырысы өткізілді.
Отырыс барысында объектілерде құрылыс және бейімдеу іс-шараларының маусымы басталатыны атап өтілді. Нысан иелері күрделі және ағымдағы жөндеу жұмыстарын жүргізуді жоспарлады. Осыған байланысты мониторингтік топтардың мүшелері осы жылы бейімделуге жоспарланған барлық объектілерді жандандырып, тексеру қажет.
Бейімделу кезінде анықталатын негізгі ескертулер: пандустың көлбеу бұрышының сәйкес келмеуі, баспалдақтардағы тұтқалар жоқтығы, санитарлық-тұрмыстық орындарға, тұрақ орындарына және тағы басқа қолжетімділік болмауы.
Мониторингтік топтарға өткен сапарлардың нәтижелері бейімделуді жүргізу кезінде ең көп бұзушылықтар Маңғыстау, Қарағанды, Атырау облыстарында анықталғанын көрсетті. Бейімделуді жүргізу бойынша оң жұмыстар Алматы, Батыс Қазақстан, Қызылорда облыстарында байқалады.
«Біздің қалада жаңа объектілер салынуда, сауда орталықтары, дүкендер, шаштараздар және басқа да үй-жайлар салынуда, алайда құрылыстардың барлық иелері мүгедектігі бар адамдар үшін кедергісіз қолжетімділікті қамтамасыз ету жөніндегі өз міндеттеріне толық жауапкершілікпен қарамайды, бұл мәселені біз мониторингтік топпен бірлесіп шешетін боламыз. Біздің қағидамыз «біз үшін, біздің қатысуымызсыз жасамаңыз», – деп атап өтті өз сөзінде «Пандус-ок» ЖШС басшысы Шахан Жолдасбаев.
Сондай-ақ, отырыс барысында нақты міндеттер талқыланды, бейімделуге жататын объектілердің саны және осы іс-шаралар әр өңірде өткізілуі тиіс мерзімдер айқындалды.
