Батыс Қазақстан облысының ветеринария басқармасы – жыл бойына ұлттық киімді ұлықтап жүрген бірден-бір басқарма.
«2018 жылы басқармада Наурыз мерекесін атап өту барысында басшымыз басқарманың мемлекеттік қызметшілеріне әр аптаның бейсенбі және жұма күндері ұлттық киімді киіп жүру туралы ұсыныс білдірген болатын. Қызметкерлердің барлығы ұсынысты қолдап, мемлекеттік қызметшілердің киім үлгісін сақтай отыра, бес жылдан бері аталған күндері ұлттық киімімізді киіп жүруді әдетке айналдырдық.
Жалпы ұлттық киім – ұлт бейнесі деп білеміз. Басқарма қызметкерлерінің бұл бастамасы эстетикалық сән ғана емес, халқымыздың мол тағылымды ұлағатын, өнегелі тәлім-тәрбиесін, бай ұлттық болмысымызды халық арасында, өскелең ұрпақ арасында насихаттау болып табылады, - дейді басқарманың әкімшілік бөлім басшысы Балдай Сапарғали.
«Ұлттық киімімізді киюіміз мәдениетіміз бен дәстүрімізге, ұлттық құндылығымызға деген құрметіміз. Алдағы уақытта осындай бастама басқа да ұйымдар тарапынан қолдау табады деп ойлаймыз.
Осы орайда, қазақ халқын Ұлыстың ұлы күні Наурыз мерекесімен құттықтаймыз! Еліміз тыныш, туған жеріміз аман болып, әрбір атқан жаңа күн әр отбасына шат көңіл, бақыт пен береке әкелсін! Ұлыс оң болсын, ақ мол болсын!», деген ізгі тілегін білдірді басқарма қызметкерлері.
zhaikpress.kz
