1.11.2024, 15:30
Оқылды: 39

Ыстамбұлда оралдық суретші қыздың көрмесі қойылды

 Таяуда Түркияның Ыстамбұл қаласы орталығында орналасқан «Pinelo Art» галереясына қылқалам шебері Алина Хожантаеваның «Жанымның айнасы» атты сурет көрмесі қойылды.

IMG_20241101_152531

 Таланты бар талапты жастың таңдаған саласы мүлде бөлек. Қазір ол Батыс Қазақстан индустриалды колледжінің «Телекоммуникациялық жабдықтар мен байланыс арналарын электромонтаждаушы- реттеуші» мамандығының 3-курс студенті. Алинаның туындыларына әлеуметтік желі арқылы көзайым болған Түрік сыншылары оны арнайы ұсыныспен шақырған екен. «Жанымның айнасы» атты 15-19 қазан айы аралығында өткен көрмеге отызға жуық жұмысы жарияланып, көптің назарына ұсынылыпты. Бала кезінен қылқаламды серік еткен ол, 2020 жылы қабілетін кәсіби тұрғыда жетілдіруді қолға алған. Сол жылы «Сурет – менің екінші өзім» атты алғашқы жеке көрмесін ашқан. Келесі жылы Даринск мұражайында «Біз бәріміз басқамыз» атты екінші жеке сурет көрмесі өткен. Орыс жазушысы Михаил Шолоховқа арналған байқауда 2023 жылы «Үздік графика» номинациясы бұйырған. 2024 жылы «ORIENTAL FLAIR» және «Vibrant Asia» халықаралық байқауларында үздік деп танылып,бірінші дәрежелі дипломмен марапатталған.

IMG-20241101-WA0128

- Әкем білікті инженер. Мен оның жолын қууды жөн көрдім. Колледжден кейін инженер болуды жоспарлап отырмын. Мектеп қабырғасында физика мен математика пәндерін сүйіп оқыған едім. Пәнаралық байқауларда топ жарып, жүлделі болып жүрдім. Облыстық, республикалық олимпиадабайқауларына қатысатын резерв құрамына алынғанмын. Сурет салуға қызығушылығым оқушы кезде басталды. БҚИК студенті атанғаннан кейін халықаралық көрмелерге бірнеше туындыларым жол тартты. Американдық Art Babe клубы ұйымдастырған көрмелерге, соның ішінде «Жаз 2024» және «Күз 2024» халықаралық онлайн көрмелеріне қатыстым. Мен Blue Space арт галереясы ұйымдастырған көрмелердің, сондай-ақ Art Channel «Бейбітшілік үшін өнер» көрмесінің финалистімін.
IMG-20241101-WA0124

Қылқаламды серік еткен суретші ару келер жылы оқуын тәмамдамақ. Бүгінде Орыс, Қытай, Ағылшын тілдерін жетік меңгерген. Яғни, әлеммен еркін байланыс орнатып, келіссөз жүргізуге қауқарлы.

IMG-20241101-WA0118

Нұрым Ғұмар,

«Орал өңірі»

Узнайте первым о важных новостях Западного Казахстана на нашей странице
в Instagram и нашем Telegram - канале