«Бірыңғай жинақтаушы зейнетақы қоры» АҚ Басқарма төрағасы Жанат Құрманов зейнетақы жинақтарын пайдалану мерзімі неліктен 45-тен 20 күнге дейін қысқарғанын айтты, деп хабарлайды ҚазАқпарат тілшісі.
Мәжілістің жалпы отырысынан кейін тілшілер сауалына жауап берген Жанат Құрманов аталған мерзімді бекіту «Отбасы банкі» мен басқа да екінші деңгейлі банктер айналысатынын жеткізді.
«БЖЗҚ қызметіне жүгіну мен өзіңнің зейнетақы жинақтарыңды өкілетті операторлардың арнайы шотына аударар алдында қандай баспананы сатып алатынын анықтап қарап, тиісті құжаттарды даярлау керек. Бұл қаражат инвестициялық айналымнан шығарылады және адамға инвестициялық кіріс әкелмейді. Шын мәнінде айналымдағы жинақ тұралап қалады. Сондықтан арнай шотта жай жатпас үшін аталған кезеңді қысқартқан тиімді болар еді», - деді Ж. Құрманов.
Осы орайда ол ел халқын құжаттарды алдын ала даярлап алып, өзіне керек баспананы айқындап алуға шақырды.
Басқарма төрағасының сөзіне қарағанда, адамдар тиісті дайындық жұмыстарын жүргізсе, Үкімет есептеуі бойынша 20 күн жеткілікті.
Еске сала кетейік, жақында зейнетақы жинақтарын пайдалану мерзімі өзгерді.
