«Жайық» футбол клубы ел шемпионатының екінші лигасында ойнауға мүмкіндік беретін ресми лицензияға ие болды. Бұл туралы өңірлік комуникациялар қызметі алаңында өткен брифингте клуб директоры Дамир Қалақов мәлімдеді. Дамир Фаатұлы лицензия клубтың дамуы үшін маңызды кезең болып табылатыны және командаға жаңа мүмкіндіктер ашатынын атап өтті. Күні кеше команда маусымға дайындығын пысықтау үшін Түркістан қаласында өтетін оқу-жаттығу жиынына аттанды.
– Лицензия алу – клуб үшін үлкен жетістік. Біз барлық талаптарға сай болу және команданы кәсіби деңгейде ойнауға дайындау үшін ауқымды жұмыс атқардық. Енді алдымызда жаңа міндеттер тұр және біз оларды орындауға дайынбыз, – деді клуб директоры.
Баспасөз мәслихатына «Жайық» футбол клубының бас бапкері Вячеслав Невольников пен команда көшбасшыларының бірі Бауыржан Омаров қатысты. Вячеслав Петрович баяндамасында маусымға дайындық қарқынды жүріп жатқанын атап өтті.
– Ойыншылардың физикалық дайындығын жақсарту, тактикалық схемаларды жетілдіру және командалық өзара әрекеттестікті қалыптастыру мақсатында Оралда арнайы жаттығу жиыны өткізілді. Жергілікті футбол мектебінің 40 шақты түлегі келіп, жаттығуға қатысты. Одан іріктелген 26 футболшы бізбен бірге Түркістан қаласында өтетін 20 күндік оқу-жаттығу жиынына барады. Ол жақта бірнеше бақылау ойыны өткізіліп, негізгі құрам жасақталады. Ойын тактикасы толық пысықталады, – деді бас бапкер Вячеслав Новольников.
Сондай-ақ бапкер «Ақжайық» сапында тәуір ойынымен көзге түскен Бекзат Иманғазеев команда сапына қосыла ма?» деген сауалға жауап берді.
– Бекзаттың аздаған жарақаты бар. Толық емделіп шыққан соң оған мүмкіндік беріледі. Барлығы футболшының өзіне байланысты, – деді бас бапкер.
Ал команда капитаны Бауыржан Омаров ойыншылардың алдағы маусымға дайын екеніне сенімді екенін білдірді. Капитан сондай-ақ лицензия – кәсіби футболға қадам басудың айғағы екеніне екпін беріп, жанкүйер сенімін ақтауға дайын екенін жеткізді.
– Команда жоғары мақсат қойып отыр, әр ойыншы өз рөлін түсінеді. Біз әр ұпай үшін күресуге дайынбыз. Жанкүйерлер қызықты әрі тартысты ойын тамашалайды, – деді Бауыржан Нұрланұлы.
Қазіргі таңда жаңа клубтың логотипінің бірнеше нұсқасы жасалды. Олардың ішінде үздігін әлеуметтік желі арқылы халық өзі таңдайды. Бұл жайында да журналистер сұрап білді.
– Логотипті таңдауды халыққа ұсынуымыздың басты себептерінің бірі – клубтың аймақ тұрғындарымен тығыз байланыста болуға деген ұмтылысы. Нақты нәтиже наурыздың 13-і күні шығады, – деді Дамир Қалақов.
«Жайық» футбол клубы спорттық жетістіктерге ғана емес, сондай-ақ Батыс Қазақстан облысында футбол мәдениетін дамытуға да баса назар аударады. Клуб басшылығы жанкүйерлермен, демеушілермен және жергілікті қауымдастықпен белсенді жұмыс істеп, аймақта футболды кеңінен насихаттауға күш салады.
– Біз клубымызды қолдайтын барлық жанға – аймақ басшылығына, демеушілерге, жанкүйерлерге, бапкерлер құрамына және ойыншыларға алғысымызды білдіреміз. Алдымызда қызықты маусым тұр, сондықтан барша футболсүйер қауымды бізді қолдауға және «Жайық» командасының ойындарын бірге тамашалауға шақырамыз! – деп атап өтті Дамир Қалаков.
«Жайық» футбол клубы кәсіби футболға ресми түрде қадам басып, аймақ намысын ұлттық деңгейде абыроймен қорғауға дайын.
Түгелбай Кенжеғалиұлы,
«Орал өңірі»
