Айта кетейік, аталған байрақты додаға 120 елден 500-ден астам ауыр атлет 16 салмақ дәрежесінде бақ сынауда. 6 қазанда екі қазақстандық зілтемірші Едіге Емберді мен Петр Хребтов ел намысын қорғаған еді.
Азия рекордсмені 79 келіге дейінгі салмақта алтыншы орынға ие болды. Емберді А тобында сайысқа түскен еді. Нәтижесінде ол жұлқа көтеруде 155 келіні бағындырып, ал серпе көтеруде 196 келіні еңсерді. Осылайша, жалпы есепте 351 келіні көтерді.
"Жалпы үздік үштікке кіруге мүмкіндік болды, бірақ өзіміз сәл аяқ тарттық. Егер жұлқа көтеруде 157-158 келіні бағындырғанда, үштікке енер едім. Серпе көтеруде де 199 келіні еңсеруге аз-ақ қалды. Жалпы, нәтиже ойдағыдай болмады. Дегенмен жеңіске жетуге мүмкіндік бар екенін сездік.
Бұл менің ересектер арасындағы алғашқы жарысым болғандықтан, жалпы нәтижеме көңілім толады. Себебі әлем чемпионатында өнер көрсетіп жүрген кейбір тәжірибелі спортшыларды басып оздым.
79 келіде қаламын деп ойлаймын. Бұл салмақта өзімді жақсы сезінемін.
Қазақстанға оралған соң қайта жаттығуға кірісеміз. Алда Ислам ойындары бар. Сол турнирге қатысамыз. Осы жарыста не жетіспейтінін білдік. 155 келі өзімнің жеке рекордым. 157-158 келіні бағындыруға күшім жететінін сезіп тұрмын. Әрі қарай сол бағытта жұмыс істейміз", - деді Едіге Емберді.
Ал оның командаласы Петр Хребтов та биыл алғаш рет ересектер арасында жүлдеге таласты. Зілтемірші жұлқа көтеруде 147 келіні еңсеріп, серпе көтеруде 183 келіні бағындырды. Жалпы есепте 330 келіні көтерді.
"Бұл менің ересектер арасында өткен алғашқы әлем чемпионатым. Сондықтан орташа деңгейде өнер көрсеттім деп ойлаймын. В тобында менің салмағымда Олимпиада жүлдегері болды. Осыдан-ақ бұл жарыстың деңгейі анағұрлым жоғары екенін байқауға болады.
Ал жарыс алдындағы негізгі жоспар - өткен сайысқа қарағанда жоғары нәтиже көрсету еді. Мысалы, жұлқа көтеруде өз рекордымды жаңарттым. Бұған дейін 146 келі көтерсем, қазір 147 келіні бағындырдым. Серпе көтеруде де бұрынғы көрсеткішім 187 келі болатын. Бұл жолы 188-ге талпынып едім, бірақ сәл сәтсіз болды. Зілтемірді ыңғайлы етіп ұстай алмадым.
Бұл менің 79 келіге дейінгі салмақтағы алғашқы жарысым болды. Енді осы салмаққа бой үйретіп, осы санатта жарысуды жалғастырып, нәтижемді жақсартуға тырысамын.
Әрі қарай жаттығуды жалғастырамыз. Қараша айында Қазақстан чемпионаты бар. Сол жарысқа дайындаламын", - деп бөлісті Петр Хребтов.
