№2 балалар-жасөспірімдер спорт мектебі КММ 2021 жылы спортшылардың жоғарғы жетістіктерге қол жеткізуін қамтамасыз етіп, спорт ұйымының нәтижелі қызметін ұйымдастырғаны үшін Батыс Қазақстан облысы дене шынықтыру және спорт басқармасының «Үздік спорттық ұйым» аталымы бойынша марапатталды.
Мектеп қызметкерлері мен жаттықтырушыларының жыл бойы атқарған тынымсыз еңбектерінің арқасында қоржынымызға Қазақстан Республикасы чемпионаттары мен халықаралық деңгейдегі жарыстарда 59 алтын, 23 күміс, 22 қола, жалпы саны 104 медаль түсті. Мектебіміздің батутта және акробатикалық жолда секіру бөлімінің спортшысы Ислам Қабдоллов Әзірбайжан Республикасының астанасы Баку қаласында жасөспірімдер арасында өткен әлем чемпионатында алтыннан алқа тағып, ел мерейін үстем етті. Исламның бұл жетістікке жетуіне жаттықтырушы-ұстазы Альберт Рахметоллаұлы Тлепқалиевтің сіңірген еңбегі орасан зор. Қазақстан Респубикасының еңбек сіңірген жаттықтырушылары – Данияр Жұмагелдиев пен Дәулет Әбдікәрімов жетекшілік ететін дойбы мен тоғызқұмалақтан БҚО құрама командасы ҚР-дағы ең үздік команда екенін дәлелдеді. Дойбышыларымыз бен тоғызқұмалақшыларымыз ҚР және Азия чемпионаттарында жеңімпаздар мен жүлдегерлер қатарынан табылса, топтық жаттығулар орындаудан спорттық акробатика бөлімінің спортшылары ҚР чемпионатында үздік атанды.
Спорттық гимнастика бөлімінің гимнасшы қыздары мен шахматшыларымыз да ел біріншіліктерінде жүлдегерлер қатарынан көрініп жүр. Жалпы айтқанда, 2021 жыл біздің ұжым үшін сәтті болды. Спортшыларымыздың дүбірлі додаларға алаңсыз дайындалып қатысуын қамтамасыз етіп, жоғарғы нәтижелерге қол жеткізуіне қолдау көрсеткен БҚО дене шынықтыру және спорт басқармасы ұжымына, басқарма басшысы Қаймен Есенаманұлына алғысымызды білдіреміз. Жаңа жыл – жаңа биік белестерді бағындырар жыл болғай!
Ерден Жанғалиев,
№2 балаларжасөспірімдер спорт мектебінің директоры,
Орал қаласы
