2024 жылы елімізде «Жобалардың инновациялық навигаторы» іске қосылды. Аталған іске асырылып жатқан барлық жобаларда ашылатын жұмыс орындарының, нысаналы индикаторларының орындалуына сапалы мониторинг жүргізуге, сондай-ақ әрбір кәсіп бөлінісінде кадрларға қажеттілікті талдап, болжауға, кадрлардың еңбек нарығына сәйкестігін талдауға, жұмыс күшіне сұраныс пен ұсынысты бағалауға мүмкіндік береді.
Сурет: telegram.org
Бұл туралы ОКҚ алаңында ҚР Еңбек және халықты әлеуметтік қорғау вице-министрі Асқар Биахметов хабарлады.
«Бүгінгі таңда 6 салалық министрлікпен жұмыс атқарылуда. 606 жоба туралы ақпарат алып, оларды талдап, қайталанатын жобаларды навигатордан алдық. Бұл жұмыс қолданыстағы жобалардың тізбесін оңтайландырып, аналитикалық деректердің сапасын арттырады», - деді спикер баспасөз конференциясы барысында.
«Жобалардың инновациялық навигаторы» 2030 жылға дейін 222 мың жұмыс орнын ашуды көздейтін жалпы саны 1415 жоба туралы ақпаратты қамтыған. Жобалардың жалпы құны 76 трлн теңге.
