Қаламыздағы «Шабыт» орталығында «AMANAT» партиясы БҚО филиалының ұйымдастыруымен облыстық жұмысшы әйелдер форумы өтті. Форумға өңірдегі ірі кәсіпорын басшылары мен өкілдері, іскер әйелдер, сондай-ақ БАҚ өкілдері қатысты. Бұл шара Қазақстанда 2025 жылдың «Жұмысшы мамандықтар жылы» болып жариялануына орай ұйымдастырылды. Мақсаты – жұмысшы әйелдердің еңбегін бағалау, олардың кәсіби дамуын қолдау және еңбек нарығындағы рөлін нығайту.
Форумның ашылуында жүргізушілер қатысушыларды құттықтап, еңбек адамдарының қоғамдағы маңызын атап өтті. «AMANAT» партиясы БҚОФ атқарушы хатшысы Азамат Сафималиев құттықтау сөз сөйлеп, өңірдің экономикалық дамуына үлес қосып жүрген жұмысшы әйелдерге ризашылығын білдірді.
– Құрметті форумға қатысушылар! Бүгін біз Қазақстанда «Жұмысшы мамандықтар жылы» аясында маңызды шараға жиналып отырмыз. Биылғы жыл – еңбек адамдарының, әсіресе, жұмысшы мамандық иелерінің мәртебесін көтеруге арналған ерекше кезең. Біздің өңірдегі сан түрлі салада қызмет етіп жүрген әйелдер қауымы – нағыз еңбектің үлгісін көрсетуде. Олар зауыттар мен фабрикаларда, құрылыс пен қызмет көрсету саласында, ауыл шаруашылығы мен өндірісте еңбек етіп, ел экономикасының дамуына өз үлесін қосып келеді. Жұмысшы мамандықтарын дамыту – елдің өркендеуі мен тұрақтылығының кепілі. Сондықтан бүгін біз осы салада абыройлы еңбек етіп жүрген бірқатар әйелдерді марапаттағалы отырмыз. Әйелдер – тек отбасының ұйытқысы ғана емес, сонымен қатар елдің дамуына үлес қосушы, жауапты, білікті мамандар. Олар отбасымен қатар қызметті де қатар алып жүріп, қоғамның өркендеуіне ықпал етіп отыр. Сіздердің еңбектеріңізге алғыс білдіреміз, әрдайым жоғары бағалаймыз, – деді ол.
Сондай-ақ іс-шара барысында өнеркәсіп саласында қажырлы еңбек етіп жүрген «Зенит» зауыты АҚ, «Желаев нан өнімдері комбинаты» АҚ, «КазАрмпром» ЖШС, «KazConstructionGroup» ЖШС, «Батыс Сервис Плюс» ЖШС, «Батыс Қазақстан құрылыс материалдары корпорациясы» АҚ, «Батыс су арнасы» ЖШС, «Охрана-КМС», «Урал Ойл энд Газ», «Жайық таза қала», «Батыс Капитал Лимитед» секілді ЖШС-лардың басшылары кәсібилігі мен қоғам дамуына қосқан үлесі үшін арнайы алғысхаттармен марапатталды. Бұл марапаттар олардың тұрақты жұмыс орындарын құрудағы, өңір экономикасын нығайтудағы және жұмысшы әйелдерді қолдаудағы еңбектерін бағалау мақсатында берілді. Форум барысында еңбекқор әйелдердің жетістіктерін насихаттайтын арнайы бейнебаян көрсетілді. Олардың бірі – трансформатор зауытында, бірі – құрылыс саласында, ал енді бірі мал шаруашылығымен айналысып, өз кәсібін дөңгелетіп отыр.
– Мен өзім жеке кәсіпкер ретінде Ақжайық ауданында бірнеше кәсіпті қатар алып жүрмін. Мал шаруашылығымен айналысамын, қоғамдық тамақтану орным бар. Сонымен қатар Тайпақ ауылында жүн өңдейтін цех ашып, онда шәркей, көрпе, төсеніш, моншаға арналған бас киімдер жасап шығарудамыз. Бұл кәсіп – ата-бабамыздан қалған дәстүрді жаңғыртып, тұрмысқа қажетті экологиялық таза өнімдер өндіруге бағытталған. Әйел адамның бойында төзімділік, еңбекқорлық, ұқыптылық секілді қасиеттер мол. Біз – отбасымызға қамқор ана, кәсібімізге адал маман, қоғамға үлес қосушы жанбыз, – деді жеке кәсіпкер, Ақжайық аудандық іскер әйелдер кеңесінің төрайымы Ләззат Сейіткереева.
Форум соңында Нұргүл Әжібайқызы, Жанна Тәжіғұлқызы, Ләззат Мұратқызы, Айнагүл Серікқызы және Ләззат Жанғалиқызы сияқты еңбекқор әйелдерге арнайы алғыс білдіріліп, марапаттар табыс етілді.
Бұл іс-шара жұмысшы әйелдердің кәсіби мәртебесін көтеру, олардың еңбек жағдайын жақсарту және мансаптық өсуіне мүмкіндік жасау мақсатында ұйымдастырылды. Қасым-Жомарт Тоқаевтың «Еңбекқорлық пен кәсіпқойлық – қоғамымызда әрдайым бірінші орында болуы тиіс» деген сөзі іс-шараның негізгі идеясын айқындай түсті.
Жанерке Ғинаят,
Орал қаласы
