Rail-news.kz ақпараттық порталының хабарлауынша, 2026 жылғы маусым айында «Қазақстан темір жолы» ҰК» АҚ локомотив паркі Alstom және CRRC компаниялары шығарған тағы 50 заманауи локомотивпен толықты.
Фото: rail-news.kz
Жаңа техниканың ең көп бөлігі — әрқайсысына 17 бірліктен Қандыағаш және Жем локомотив деполарына үлестірілді. Бұдан бөлек, 9 локомотив Ақтоғайға, 6 локомотив Астанаға және 1 техника Балқаш локомотив депосына бағытталды.
Жалпы алғанда, 2026 жылдың басынан бері еліміздің теміржол желісіне 134 жаңа тартушы жылжымалы құрам жеткізілді. Олардың қатарында Wabtec пен CRRC магистральдық және маневрлік тепловоздары, сондай-ақ Alstom электровоздары бар. Бұл техникалар Астана, Қызылорда, Қарағанды, Атырау, Маңғыстау, Павлодар секілді елдің 12 ірі теміржол депосында сәтті пайдаланылуда. Паркті кезең-кезеңімен жаңарту тасымал процесінің сенімділігін, қауіпсіздігін және тиімділігін арттыруға арналған ҚТЖ-ның кешенді бағдарламасы аясында іске асырылып жатыр.
Жаңа локомотивтерде пайдалану шығындарын азайтатын заманауи техникалық шешімдер қолданылған. Сонымен қатар локомотив бригадалары үшін қолайлы еңбек жағдайын жасауға ерекше мән берілген. Машинистердің кабиналары заманауи климат-бақылау жүйелерімен, тоңазытқыштармен, тамақ жылыту құрылғыларымен және эргономикалық орындықтармен жабдықталған.
