Бүгін жылдың жемісін саралап, еліміздің келешегіне бағдар салған Президентіміздің «Мақсатым – экономиканы және егемендікті нығайту» атты мақаласын оқып шықтым. Онда көрсетілген міндеттер мен бастамалар – еліміздің одан әрі дамуының сөзсіз сара жолы.
Мемлекет басшысының сұхбатта айтқан пікіріне сай, елімізді өркендетудің негізіне шынайы өндірістік еңбекті қоюға тиіспіз. Еңбек қоғамның нағыз қозғаушы күші екенін үлкен де, кіші де жақсы білгені абзал. «Еңбектің көзін тапсаң, байлықтың өзін табасың» десек те, оның білімсіз, дәлірек айтсақ, арнаулы кәсіби мамандықсыз болуы қиын. Президентіміз Қасым-Жомарт Кемелұлы Тоқаев әсіресе жастардың белгілі бір кәсіптік саладан өз болашағын көруі қажеттілігіне меңзеді. Бұл өте қалыпты жағдай. Өйткені адам өзінің қайда бет алғандығын анық көрген кезде ғана биікке қарай күш-жігерін ұштайды. Мына жаңа дәуір жас адамнан білімділікті, кәсіби шеберлікті, ізденуді анық қажет етуде. Осы орайда еліміздегі кәсіптік мамандық беретін оқу жүйелерінің орны ерекше. Соның бірі – Ақжайық аграрлық-техникалық колледжі.
Құрылғанына жарты ғасырдан астам уақыт өткен тәрбие және білім ұясы сан алуан мамандық иелеріне өмірге жолдама беріп келеді. Біздің оқытушылар ұжымы негізгі міндет жұмысшы кадрлар мен мамандарды даярлау сапасын арттыру және кәсіптік білім берудің қолжетімділігін қамтамасыз ету керек екенін терең түсініп отыр. Оқыту мазмұнын үздіксіз жетілдіру, мұғалімдер мен өндіріс шеберлерінің білімін көтеру, оқу-материалдық базасын жақсарта түсу бағытында жан-жақты істер атқарылуда. Колледжде шәкірттер үшін барлық жағдай жасалған.
Бүгінде тракторшы-машинист, автомеханик, есеп және аудит, аспаздар, тағы басқа мамандық иелері қай жерде де сұранысқа ие. Типтік жобадағы оқу корпустары, жайлы жатақхана, цехтар, зертхана шәкірттердің алаңсыз білім алуы үшін қолайлы жабдықталған. Колледж ұжымы қазіргі уақыт талабына сай, ізденісті күшейтіп, алда да қыз-жігіттерді өңірімізде сұранысқа ие мамандықтарға оқытуға күш салады.
Жарас Сағындықов,
Ақжайық аграрлық-техникалық колледжінің директоры
