Көп жыл ауыл шаруашылық саласында еселі еңбек еткен ардагер, Шежін ауылының тұрғыны Құбайдолла Танабаев 85 жасқа толды. Соған орай Тасқала ауданы әкімінің орынбасары Рауан Рахметтулин, аудандық ардагерлер кеңесінің төрағасы Жәрдемғали Балықов, Тасқала ауылдық округі ардагерлер кеңесінің төрағасы Мақсот Залиев және Шежін ауылдық округінің әкімі Мержан Ескалиев мерейтой иесінің шаңырағыгнда болып, мерейлі жасымен құттықтады.
Алдымен сөз алған аудан әкімінің орынбасары Рауан Бисенғалиев жылы лебізін білдіріп, Құбайдолла ақсақалдың иығына шапан жауып, аудан әкімі Талғат Шакировтың атынан құттықтау хатын табыстаса, Жәрдемғали Абылғалиұлы да туған күн иесінің кеудесіне «Тасқала ауданының құрметті ардагері» төсбелгісін тақты. Айта кетейік Құбайдолла Дүйсеұлын 1964 жылы Орал қаласындағы Батыс Қазақстан ауыл шаруашылық институтына түсіп, оны 1969 жылы аяқтап, агроном мамандығын алып шыққан.
Оқу бітіргесін Шежін совхозының 3 ші бөлімшесінде агроном, 3 ай бөлімше зоотехнигі, 6 ай бөлімше меңгеруші болып қызмет атқарған. 1970 жылы сол совхозға бас агроном болып тағайындалып, содан 1988 жылға дейін үзіліссіз қызмет жасаған. 1974 жылдан бастап 1998 жылға дейін совхоз директорының өндіріс жөніндегі орынбасары лауазымын қоса атқарған. Екі қыз 3 ұлды өмірге әкеліп, оларды тәрбиелеп өсірген. Бүгінде олардан тараған немере жиендердің қызығына бөленіп отырған бақытты ата.
Назерке Шайхоллақызы,
Тасқала ауданы
