Теректі ауданында соңғы жылдарда өлең-жыр додасы жиі өтіп жүргені көпке мәлім. Талай мықтылар туған киелі өлкеде бүгін де сондай бір жас ақындар мүшайрасы өтті.
Жыр кеші Теректі ауданының 90 жылдығына және ақын, журналист, Қазақстан Жазушылар Одағының мүшесі, ұстаз, жерлесіміз Ақмаржан Таубаеваның 65 жылдығына орай ұйымдастырылған болатын.
Ақындарға Қазақстан Жазушылар Одағының мүшесі, ақын, журналист Ғайсағали Сейтақ, ақын, жұбантанушы Үзілдік Елубайқызы, «Бұлқыныс» кітабының авторы, ақынның бауыры Қайыржан Таубаев, Қазақстан Жазушылар Одағының мүшесі, «Теректі жаңалығы-Теректинская новь» қоғамдық-саяси газетінің бас редакторы, ақын Әділет Орынбасаров әділ бағасын берді.
Сондай-ақ шараға ақын қыздың сіңілісі Мәриям Таубаева, аудандық маслихат төрағасы Әлжан Нұрғалиев, «AMANAT» партиясының аудандық филиалының төрағасы Мирхат Ибраев құрметті қонақ ретінде қатысты. Мүшайраға келген қонақтарға қош келдіңіз айтқан аудан әкімінің орынбасары Қалаубек Теміров барша қатысушыларға сәттілік тіледі.
- Баршаңыз текті мекен Теректі еліне қош келдіңіздер. Биыл ауданымыз үшін мерекелі жыл. Аудынымыздың құрылғанына 90 жыл толуын тойлағалы отырмыз. Оған қоса заңғар жазушы Хамза Есенжановтың туғанына 115 жыл толуын тойласақ, енді міне ақын апамызға арналған жыр мүшайрасы өткелі отыр. Аңқаты ауылдық округіне қарасты кішкентай ғана Қандық ауылында туып, өңіріміздің руханиятына өшпес із салған ақын қызын елі ұмытпақ емес. Оның қалдырған мұралары мәңгілік,- деді өз сөзінде аудан әкімінің орынбасары Қалаубек Баубекұлы.
«Тектілерге мекен болған Теректім» деген атаумен өткен додаға он ақын қатысты. Ақындар екі өлең оқыды. Алғашқысы аудан жайында жыр болса, келесісі Ақмаржан Бақытқызына арналды. Алғаш болып суырылып ортаға шығып, «Қандықта туып халқынның жұрағаты боп, Қастерлі ана тілімнің жанашыры боп»,деп жырын бастаған Ақжайық ауданынан келген Абылайхан Мақсұтовқа көпшілік сүйсінді. Одан әрі Ақтілек Әлібекұлы (Жәнібек ауданы), Аманжол Исламғали (Орал), Аңсар Жетпісқалиев (Сырым ауданы), Бекболат Қаленов (Ақжайық ауданы), Дәурен Шамұратов ( Теректі ауданы), Меңдібек Лұқпанов (Тасқала ауданы), Мейрамбек Сыдықов (Бөрлі ауданы), Нұрасыл Иса (Орал) және Мәрлен Ғилымхан (Жаңақала ауданы) өз туындыларын нақышына келтіре оқыды.
Сайыс жайында әділқазылар алқасының мүшесі Ғайсағали Сейтақ:
- Барша өнер көрсеткен ақындар өте таныс. Барлығы да мықты, бірақ сайыс болған соң арнайы жүлдесі бар. Баға беру оңай болған жоқ. Барша жас ақындарға рақмет, - деп ізгі ниетін білдірді.
Сайып келгенде Бас жүлдеге теректілік ақын Дәурен Шамұратов (100 мың теңге) лайық деп танылды. Жүлделі I орын Жәнібек ауданының жас ақыны Ақтілек Әлібекұлының (70 мың теңге) еншісінде.
II орынды жаңақалалық Мәрлен Ғилымхан (50 мың теңге) иеленсе, III орын ақжайықтық Абылайхан Мақсұтовқа (35 мың теңге) бұйырды.
Ақынның отбасының атынан Ақжайық ауданының ақыны Бекболат Қаленовке арнайы жүлде (35 мың теңге) табысталса, Үзілдік Елубайқызы өз атынан тасқалалық Меңдібек Лұқпановқа ақшалай сыйлық табыстады.
Қалған қатысушыларға алғысхат пен 20 мың теңге көлемінде ақшалай сыйлық берілді.
Балнұр Қанаева
Теректі ауданы
zhaikpress.kz
