Оралдағы Ақжайық ауданы ардагерлері бастауыш ұйымының құрамында бүгінде 70-тен аса мүше бар. Олар үшін жуырда айтулы басқосу ұйымдастырылды.
Қариялар мінген көліктер «Мечта» кемпингіне жетіп, тізгін тартқан соң-ақ, алдын ала белгіленгендей, дартстан бәсеке қызып жүре берді. Жарыс десе, арқалары қозып елеңдеген жасамыстар аз ба?! Есептің, дәлдіктің сынағында ерекшеленген Қанат Оразғалиев, Есенғали Уәлиев және Әнуат Таумовты басқалардың арқадан қағып, қошеметтеуінің өзі-ақ бір керемет көңіл-хошты әйгіледі.
Шағын футболдың да тартысты, тартымды сәттері аз болмады. Мұнда құрамында белгілі спорт ардагері Идаят Манашев, бастауыш ұйым төрағасы Жанат Сағынаев бар, Есенғали Уәлиев бастаған команда мықты деп танылды.
Шаһар шуынан аулақ, жасыл желегі жайқалған жерде мәре-сәре жиналғандарға осындай шараларда бұрыннан мәлім «Ағалар әуені» ансамблінен Әнуар Таумов, Арман Бұрымбаев, Тілекқабыл Ғұбашев, Қапиет Ғинаятұлы ән-күй арнады.
Сондай-ақ бүгінде қалалық «Асыл әже» ансамблінің мүшесі, аудандасымыз Сәуле Нұрғалиева сынды көркемөнерпаздар «құлақтан кіріп, бойды алған...» әндер сыйлады көпшілікке.
Айтқандайын, осы С.Нұрғалиева сынды әжелердің, ұйымның басқа да мүшелерінің өткендегі су тасқынының қатерлі, қорқынышты күндерінде шаһарды қорғауға белсене қатысқанына жүздесу барысында жылы лебіздер арналды.
Олар әлденеше тұста қарғынмен арпалысқан ұжымдарға, әскерлерге, тұрғындарға көмекке әлденеше күн қатарынан келіп, ас-су дайындап апарды. Қолөнерлерімен де танымал, Оралдағы «28 ілмек» клубының мүшесі (клуб мүшелері шала туған шақалақтар үшін қой жүнінен киім-кешек дайындап, қайырымдылықпен шұғылданады) Сәуле ана сынды жандар ауыл-еліміздің мерейі саналады.
Саяда жайылған кең дастарқан басында елдік, бірлік жайында сөз сапталды. Қашанғыдай, ауылдарымыздағы, қаладағы мәдени-көпшілік шаралардан тыс қалмау жайы, ұйым жоспары пысықталды.
Сейілдеп, сергіп қалған ардагерлер осындай дидарласу үшін ұйым төрағасы Ж.Сағыневқа, көмекшілеріне зор алғыс арнады.
Ынталы Ыбырайұлы
Ақжайық ауданы
