Ақжайық аграрлық техникалық колледжі «Жұмысшы мамандықтар жылына» орай «JuniorSkills: Болашақ мамандары» байқауын ұйымдастырды.
Жас ұрпаққа кәсіби бағдар беру, мамандықтардың ерекшеліктерімен таныстыруды мақсат еткен байқауға Абай атындағы мектеп-гимназиясы, М.Әуезов атындағы, №1 орта мектептері және Жайық негізгі мектептің 9 сынып оқушылары қатысты. Мұнда оқушылар «аспаз ісі» және «дәнекерлеу технологиясы» бойынша өзара сайысқа түсті.
Оқушы қыздар түскі дастарханды әрлеп, жемістерден, көкіністерден сусындар дайындаса, ер балалар қоқыс жәшігін жасап, профиль құбырларынан ою иіп, құбырлардан киім кептіргіш құралдарын дәнекерлеп шығарды. Сайыс қорытындысы келесідей: «аспаз ісі» бойынша Абай атындағы мектеп-гимназиясы, «дәнекерлеу технологиясынан» №1 орта мектебі оқушылары І орынға ие болды. Аталмыш байқау дәстүрлі түрде жыл сайын өтеді.
Аида Асылбек,
Ақжайық ауданы
