Казталов ауданы орталығында «Айбын» спорт клубының ұйымдастыруымен ат спортының үздіктерін марапаттау рәсімі өтті.
Салтанатты шараға аудан әкімі Рүстем Зұлқашев қатысып, атбегілер мен шабандоздарды Жаңа жыл мерекесімен құттықтап, жылы лебізін білдірді.
Марапаттау рәсімінің алдыңғы легін «Бәйге» федерациясының аудандық филиалының президенті Нұрболат Әдиетов бастап, «Спорт жұлдыздары» республикалық ғылыми-әдістемелік журналы редакция алқасының шешімімен «Дене шынықтыру мен спортты дамытуға қосқан үлесі үшін» және Қазақстанда туған спорттық қолтума бәйге аттарының өсіп өркендеп, дамуына қосқан үлесі, ерен еңбегі мен табандылығы үшін «Ұлт мақтанышы» медальдарымен марапатталды.
Сондай-ақ БҚО Бәйге федерациясына аудан әкімінің алғысхаты табысталып, шапан жабылды.
Қорытынды кеш барысында Ырысбай Егінбек, Ерасыл Нұрғали, Арман Аманжол, Еркеш Усан, Ершат Омарғалиев үздік шабандоздар қатарынан көрінсе, Ербол Қиясов, Миржас Төлегенов, Аманжол Қажығалиев, Бағнұр Қабдығалиев, Бексұлтан Ибатов, Талғат Есболов, Нұрболат Шоқпаров, Нұрлан Нұғманов, Серік Ахетов, Абылай Шакуов үздік атбегі аталымдарымен және спортқа деген жанашырлығы үшін аудан әкімінің алғыс хатымен және естелік сыйлықтарымен марапатталды.
Салтанатты кешті ауданның белгілі өнер майталмандары жанды дауыстағы әндерімен, ырғақты билерімен әрледі.
Асылбек Нәсіпқали,
Казталов ауданы
zhaikpress.kz
