Жаңақала ауданының әкімі Наурызбай Қарағойшиннің тұрғындар алдында есепті кездесуіне облыс әкімі Ғали Есқалиев, облыстық мәслихат хатшысы Мәлік Құлшар, облыс әкімінің орынбасары Тимуржан Шәкімов және облыстық басқарма басшылары мен облыстық бұқаралық ақпарат құралдары өкілдері қатысты.
Есепті кездесуден бұрын өңір басшысы аудан орталығында салынып жатқан 160 орындық дене шынықтыру-сауықтыру кешенінің құрылысын аралады. Сметалық құны 350 204 111теңге болатын аталмыш құрылыс биылғы 15 мамыр күні аяқталуы тиіс. Облыс әкімі құрылыс басында мердігер «Жайыксельстрой» ЖШС-ның басшылығы және жұмысшыларымен кездесіп, жұмыс барысымен танысты. Жұмыстың жоспарға сай жүріп жатқанын айтқан құрылысшыларға Ғали Нәжімеденұлы сын-ескертпелерін айтып, құрылысты сапалы жүргізуді тапсырды.
Аудан әкімінің тұрғындар алдында есеп беру кездесуіне облыс орталығынан келген өкілдермен қатар, ауданның еңбек ардагерлері, ауылдық округтердің өкілдері, шаруа қожалықтарының жетекшілері, кәсіпкерлер, білім беру, денсаулық сақтау, мәдениет саласы, жастар және басқа да салалардың қызметкерлері, үкіметтік емес ұйымдар мен жалпы аудан халқы қатысты.
Аудан әкімі Наурызбай Қадырбайұлы ауданның бюджеті, мал шаруашылығы, білім мен денсаулық сақтау саласы бойынша атқарылған жұмыстар турасында баяндады. Атқарылған игі істермен қатар, ауданның бүгінгі таңдағы өзекті мәселелеріне де кеңінен тоқталған 2020 жылы және алдағы жылдарға жоспарланған жұмыстар жөнінде мәлімет берілді.
Аудан әкімінің баяндамасынан соң өздерінің ұсыныс-пікірлерін білдіру үшін аудан тұрғындары сөз алды. Талғат Мұратов аудан халқымен қатар автокөлік санының да көбейіп келе жатқанын айтып, жол қауіпсіздігі үшін аудан орталығындағы көшелерге бағдаршам орнату керектігін және Бірлік пен М.Мирманов көшелеріне жөндеу қажет ететіндігін айтты. Ал зейнеткер Қымбат Молдаханова газ есептеу қондырғысын ауыстырту зейнеткерге оңай емес екендігін айта отырып, ауылдағы көгілдір отын қызметіне жауапты «РЦКУ-Орал» ЖШС-ның менеджері үстінен шағым айтты. Келесі кезекте аудандық Қоғамдық кеңестің мүшесі Руслан Оразалиев Астана көшесіне асфальт салынса деген ұсынысын айтса, Қырқопа ауылдық ардагерлер кеңесінің төрағасы Жасқайрат Төлеуғалиев қырқопалық ағайындардың атынан ауыз су мәселесін көтерді. Жаңажол ауылдық округінің тұрғыны, зейнеткер Сәрсенғали Набидуллин жаңажолдықтардың 4 жылдан бері мәдениет үйінсіз отырғандығын алға тартып, ауылға клуб салып беруді сұрады.
Жаңақала ауылының тұрғыны Исатай Сәрсенов болса жол полицияларының жұмысын тексеру керектігін айта келе, ауыз суды үнемдеу мақсатында аудан орталығындағы автокөлік жуу орындарын жабу керектігін тілге тиек етті. Сондай-ақ өз пікірін білдіру үшін мінберге көтерілген зейнеткер Жанболат Семенов аудан әкімінің жұмысына қанағаттанарлық деген баға беріп, облыс басшысына өзен-көлдердің кеуіп бара жатырғандығын, көлдерге су жақсы келуі үшін каналдарды тазалау қажет екендігін айтып дабыл қақты.
Пікір айтушылардың қатарынан көрінген Шаһидолла Әбуғали де ауданда атқарылып жатырған жұмыстарға оң бағасын бере келе, аудандағы сауықтыру орталығының жабылып қалу қаупі барын алға тартып, Ғали Нәжімеденұлына өз қадағалауына алуын өтінді.
Сонымен қатар Шаһидолла аға қыстақтардағы электр желілерін жөндеу мен күтіп ұстау жұмыстары жөнінде мәселе көтеріп, «Қазір ұялы телефонға орнатылып жатырған кассалық аппаратқа не үшін Қазтелеком 1500 теңге абоненттік төлем сұрайды? Ол заңды ма?» деген сауалын да жолдады. Ауылға ортақ мәселе көтерген аудан тұрғындарының аудан көлемінде шешілетін сұрақтарына аудан әкімі Наурызбай Қарағойшин, ал күрмеуі облыс көлемінде шешілетін мәселелерге өңір басшысы Ғали Нәжімеденұлы заң аясында тұшымды жауаптарын берді.
Жиынды қорытындылаған облыс басшысы аудан тұрғындары тарапынан айтылған ұсыныс-пікірлер мен сын-ескертпелер ескеріліп, олардың орындалуына жергілікті атқарушы билік жұмыстанатындығын жеткізді. Есепті кездесуден соң облыс әкімі Ғали Есқалиев өздерін мазалаған сұрақтары бойынша ауыл тұрғындарын жеке қабылдады.
Нұрғали Ғаббас
Жаңақала ауданы
zhaikpress.kz
Батыс Қазақстанның маңызды жаңалықтарын біздің Instagram-дағы парақшамыздан және Telegram арнамыздан алғашқы болып біліңіздер
